KHAWTHLIR

Power & Electricity department chuan vawiin Inrinni hian Mualpuia 33KV Sub-Station-ah hna an thawh dawn avangin zing dar 7 aṭanga tlai dar 5 thleng kawlphetha an titawp dawn a, mipui hriatthiamna an ngen. Vawiina kawlphetha hmu lo turte chu - Republic Veng, College Veng, Venghlui, Bethle-hem Veng, Bethlehem Vengthlang, Tuithiang, Saron Veng ṭhenkhat, Mualpui, ITI Veng ṭhenkhat, Armed Veng North & South, Venghnuai, Salem Veng, Lungleng, Vawkzawn leh Zokhawsang te an ni.

Central YMA hnuaia Literature Sub-Committee chuan nimin CYMA Committee Room-ah Mizo ṭawng hman fimkhur leh humhalh chungchangah print media leh visual media lama inhmangte nen inkawmhona hun an buatsaih. He hun hi CYMA finance secretary Fabian Lalfakawma'n a kaihruai a; Mizoram University-a Mizo department HoD Prof. Laltluangliana Khiangte leh CYMA lam aṭangin F Lalneihsanga  ten paper an present a ni.

Lunglei Police-te chuan nimin chawhnu dar 1:30 vel khan Lunglei Zo-tlangah Aizawl-Lunglei maxicab service MZ-02 B-1897 aṭangin heroin no. 4 gram 62.2 leh a neitua puh Laichhingpuii (50) d/o Hmingliana, Champhai Venglai nia insawi an man. Heroin an man hi Lungleia an hralhna ang chuan Rs. 2,00,000 vel hû a ni.

St. Paul's Higher Secondary chuan nimin khan Paulians' Day an hmang a, Class of 1994-te chu khuallian an ni. Inkhawmah hian zirlai ti ṭhate chawimawina hun an hmang a, zirlai lut mekte nen hun hlimawm takin an hmangho a ni.

Ex-Hmar Volunteer Association chuan thuchhuah siamin, Mizoram sorkar leh HPC(D) inremna anga din Sinlung Hills Council (SHC) interim sorkar ding lai term chu pawhsei tawh loh ni se an duh thu an tarlang a, “Mipuite’n an chanvo dik tak hmang a, an aiawh an thlan theih nan SHC election a rang thei anga buatsaih turin sorkar kan ngen,” an ti.