MCSA-in General Conference an hmang
Mizoram Civil Service Association (MCSA) chuan nimin khan Berawtlangah General Conference vawi 44-na an hmang a, minister Lalchamliana'n a hmanpui. Minister chuan, rinawm taka hna thawk turin MCS officer-te a fuih.
Lalchamliana chuan, MCS-te chu sorkar tana hna pawimawh tak thawktu an nih thu sawiin, "Hna hrang hrang in chelhnaah rinawm taka hna thawh hi a pawimawh hmasa a ni. Dik leh rinawm taka hna thawh hi a Kristian a, a Mizo bawk a; mahniah lungawina min pek mai bakah, mi dangte tana chhawr tlak leh ṭangkai kan nih phah ṭhin," a ti.
Inrêlbawlna kalpui dan kawng pawimawh pahnih a awm thu sawiin Lalchamliana chuan, "Chungte chu mechanical approach leh humanistic approach a ni. Mipuite tana rawngbawlna hlâwk zawk kan kalpui theih nan humanistic approach hi kan hman fo a ṭha,” a ti a; thingtlang lama khawsak harsatziate hriat chian a ngaih thu a sawi.
Home Minister chuan, mi harsa leh rethei zawkte dâwm kân an nih theih nan sorkarin ngaihtuahna a sên nasat thu sawiin, "Health Care Scheme-te duangin changtlung taka kalpui tum a ni. MLA zawng zawngte'n kan thla hlawh aṭanga zaa pakhat hi Health Care Scheme atana thawh turin kan rél a, sorkar hnathawk dangte pawh hetiang anga ngaihtuahna pu ve turin ka chah a ni,” a ti.
MCS-a tling tharte fuihna thu sawitu SIRDPR director Vanlalmawia chuan, inen lêt peih mi nih a pawimawh thu sawiin, "Mi dang hian eng angin nge min hmuh tih kan inchhût nawn fo a pawimawh," a ti a; rinawmna, taimakna, hna thiamna leh inzirnaahte hma sawn tuma inen lêt peih mi nih tum turin a chah.
MCSA inkhawmpui hi an pawl vice president K Laldingliana'n a kaihruai a, president Lalzirmawia Chhangte pawhin thu a sawi. Mizoramah MCS officer 213 an awm mek a, supertime grade-A panga, supertime grade-B pasarih, selection grade 24, junior administrative grade 44, senior grade 80 leh junior grade 53 an ni.