Session-a ZPM MLA-te chêt danah lawm

ZPM ṭhalai chuan thuchhuah siamin, Mizoram Legislative Assembly pariatna session vawi thumna, June 12-27, 2019 chhunga tluang taka zawh a ni chu lawmawm an tih thu leh, session-ah ZPM member-te'n Mizoram budget leh sorkar kalphung siamṭha tura theihtawp an chhuah chu ropui an tih thu an tarlang a, "Chîk taka Mizoram budget an chhui chianna chuan rah ṭha chhuah ngei se kan ti hle a ni," an ti.

ZPM ṭhalaite chuan, MNF sorkar hmasak laia Mizoram leiba pung nasa lutuk ang a thlen nawn tawh loh nan chief minister Zoramthanga, Finance minister ni bawk chu fimkhur taka sorkar sum hmang turin an ngen a; "Kan state leibat zat, state lian pui pui leh thawh chhuah ngah takte leiba nena khaikhin fo hi Finance Minister tih atan chuan thil âwm lo tak a ni," tiin, cheng nuai 100 neiin chegn nuai 10 a pûk leh, cheng nuai khat neiin cheng nuai 10 a pûk chu a inan loh nasat thu an sawi.

Kum 2019-20 Mizoram budget sawihonaa CM Zoramthanga'n, 'Thingkhawnpui' a tih fo chuan budget siamah leh financial management-ah CM chu a hlawhchhamzia tilangtua an ngaih thu sawiin ZPM ṭhalai chuan, "Department hrang hrangin hmasawnna an thawhna tur an department budget-a dah lo a, 'Thingkhawnpui' aṭanga lak tur a nih chuan, department tam takah work plan mumal a awm loah kan ngai a, Thingkhawnpui aṭangin minister-te'n an páwng inchuh mai dawn niin a lang," an ti.