KHAWTHLIR

Nimin khan Khawzawl College NSS unit chuan college multipurpose hall-ah thisen pek rûnpui an huaihawt a, NSS volunteers mipa 65 leh hmeichhia 18-te'n Champhai Civil Hospital tan thisen unit 85 an pe. ṬKP, Bungtlang South Pastor Bial pawhin an khaw community hall-ah thisen pek rûnpui huaihawtin, Lawngtlai District Hospital tan thisen unit 33 an pe a, a petute mipa 31 leh hmeichhia pahnih an ni. 

Higher & Technical Education minister Dr R Lalthangliana chuan INC member C Ngunlianchunga zawhna chhangin, tun hnaiah HTE department hnuaiah college-ah zirlai an pun avangin casual-a thawk tur zirtirtu 100 lak belh a nih thu a sawi. 

Lungleia inkulh Assam Rifles-te chuan Lawngtlaia medical mite nen thawkhoin March 5-10, 2021 chhung khan  Lawngtlai district-a khua/hmun ṭhenkhat - Zorinpui, Tuithumhnar leh Parva-ahte 'Mobile COVID-19 Vaccination Sessions' an buatsaih a; Assam Rifles mi leh sa 81, BSF mi leh sa 40 leh tualchhung mi 160-te hnenah Covid vaccine an pe.

Tuikual North Middle School chuan nimin khan an kum 50 tlin, golden jubilee an lawm a, minister of state Lalruatkima, bialtu MLA chu khuallian niin, AMC deputy mayor R Thanglura, bialtu councillor khualzahawm a ni. Tuikual North M/S hi kum 1970-a din a ni.

Serchhip additional DC Lalmuansanga Ralte chuan nimin han Serchhip District Industries Centre-ah thla thum awh tur puan bàn leh puan tah zirna a hawng. He zirnaah hian Serchhip veng hrang hranga mi 23-in a thawh khat nan khawl panga hmangin training bul an ṭan a ni.

Khawzawl district-a Ngaizawl khaw pa, Khup Sian Sang (39) h/o Suan Ngaih Dim chu March 10, Nilaini zan khan Telsuan ram kâng an ṭhelhnaah chesualin léngkìrah a tla a, Champhai District Hospital-ah thlenpui a nih hnuah a hliam tuar loin nimin zing dar 2 khan a thi. A nupui leh an fate panga a kalsan a ni.