Tuia Aizawl harsat lohna tura hmalakna tarlang; 'Kum 2030 thleng a daih beisei a ni' - Dy. CM

Nimin Assembly session-ah PHE changtu deputy chief minister Tawnluia chuan, tuia Aizawl mipui an harsat lohna tura hmalakna hrang hrangte a tarlang a, "Zawhfel a nih hun chuan engineer-te'n an chhût danin, kum 2030 thleng min daih beisei a ni," a ti.

Zawhna hrang hrangte chhángin Tawnluia chuan, Tanhril thlang, Tlawng lui Setlâk lui chhuah aṭanga Laipuitlanga tui la chho turin Aizawl Greater Water Supply Scheme Phase-III buaipui mek a nih thu a sawi a, "Tui pump chhuah theih phase-I leh II belkhawm aiin a tam dawn a, ni khatah litre maktaduai 37 a pump chhuak thei dawn," a ti a; Phase-I leh Phase-II hmangin ni khatah litre maktaduai 26 pump theih a nih thu a sawi.

Dy. Chief Minister chuan, GAWSS Phase-III atan pipe km. 15 phûm turah km. khat leh a chanve phûm hmabak a la awm thu sawiin, "Vaivakawn khawthlangin hlauhthawn deuh an nei a, tunah chuan harsatna awm theia an ngaiah hrethiam takin min remtihsak tawh. Tun ṭhál chhung ngei hian phûm zawh hman kan inbeisei," a ti.

Ṭawi lam aṭangin lei hîpna (gravitation) hmangin Aizawl tan tui lâk tum a nih thu sawiin Tawnluia chuan, "Aizawl chhim lam châwm tura ruahman a ni. Hna 30%-40% vel zawh a ni tawh. Covid-19 avangin hnathawkte an haw vek a, hun eng emaw chen thawh theih a ni lo," a ti a, tunah chuan thawh chhunzawm leh a nih tawh thu a sawi.

Deputy CM chuan, hmalakna hrang hrangte chu zawh a nih hunah engineer-te chuan kum 2030 thleng Aizawlin tui hnianghnâra a neih theih an beisei thu a sawi a, "Tui pump tam mah ila, a sem darh dan a pawimawh. Chumi atan chuan distribution line pawh buaipui mek a ni," a ti.