Serchhipah Special Handloom Expo

Mizoram Handloom & Handicrafts Development Corporation Limited (ZOHANDCO) chuan nimin khan Serchhip Auditorium-ah Special Hand­loom Expo 2021 an buatsaih a, Aizawl mayor Lalrinenga Sailo-in a hawng.

Lalrinenga Sailo chuan, Mizo ziaráng tilang thei thil siamte khawvelah a lâr ve tawh hle tih sawiin, "Ṭan kan lâk zel a ṭul a, a siamtute pawhin rintlak zawk leh tlo zawkin an thil siamte an tihchangtlun ve zel a pawimawh," a ti a; hnam zia tilang thei thawmhnaw leh thil dangte chu mipuiin an hlut zel thu leh a buaipuitute tan a hlâwk tial tial a beisei thu a sawi.

Special Handloom Expo-ah hian puantah leh thiamhnáng hmanga thil siam chi hrang hrang zawrh a ni a, vawiinah Vendors Development Programme buatsaih a ni ang.