MPCC-in kohhran palzûtah sorkar an puh

Mizoram Pradesh Congress Committee (MPCC) chuan thu­chhuah siamin, Mizoram sorkar chu kohhrante palzútah an puh a; kohhrante zah tur leh palzút mai mai tawh lo turin sorkar an chah nghal.

MPCC chuan, March 9, 2021-a Health Minister leh Home Minister-te hoa sorkar hotute leh páwl hrang hrang aiawhte ṭhukhawm rorêl chungchang March 9 vêka sorkar thuchhuah (No. 7739/2020-2021)-ah, Covid-19 dinhmunin ziaawm lam a pan avangin chawlhkar khatah zan hnih biak-ina inkhawm phal a nih tawh dawn thu leh inkhawmnaah zaiho phal a nih tawh dawn thu tarlan a nih thu tarlang a; chu thutlukna avang chuan mipui an lâwm hman hle tih an sawi.

March 10, Nilainia DMR depart­ment-in thuchhuah dang siamin, a hma nía sorkar thuchhuak chu a rawn ṭhiat leh nghal a, inkhawmnaah Pathian faka zai phal a nih loh thu an chhuah tih sawiin MPCC chuan, "Hei hian Mizoram sorkarin rorelna felfai a neih lohzia leh kohhran a zah lohzia te, Covid-19 behchhana kohhran a palzût nasatzia a tarlang chiang hle," an ti.

MPCC chuan, MNF party punkhawmnaah zai leh lâm a pawi loh laia kohhran inkhawma zai an remti lo tlat chu mak an tih thu sawiin, "Kohhrante hi Covid-19 kaihhruaina zâwm ṭha berte zinga mi, sorkar thutlukna apiang lâwm taka pawm zel thei an ni a, Mizoram sorkar pawh hian a zah tur a ni," an ti a; kohhrante palzût mai mai tawh lo turin MNF sorkar an chah.