Buhfai door to door delivery ti turin ngaihtuah mek a ni - FCSCA Minister

Food, Civil Supplies & Con­sumer Affairs (FCSCA) minister K Lalrinliana chuan, in tina buhfai dah (door to door delivery) kalpui chungchang ngaihtuah mek a nih thu nimin khan Assembly House a hrilh.

MNF member H Biakzauva zawh kal zelah K Lalrinliana chuan, door to door delivery chu National Food Security Act (NFSA) hnuaia tih ngei tur a nih thu sawiin, "Mipuite'n dik takin buhfai an chang thei ang tih ngaihtuahna aṭanga lo chhuak a ni. Tlin lohna tam tak a awm. Central lamin min rawn zawt reng a, tih loh tawp ai chuan Aizawl East DCSO huam chhungah tih chhin dan kan ngaihtuah," a ti.

INC member KT Rokhaw leh MNF member Lalrintluanga Sailo ten an bial chhunga signal a awm loh avanga e-POSS machine hman theih a nih loh thu sawiin, "E-POSS machine hmang lo chuan buhfai sem phal a ni si lo a, mipuiin harsatna an tawh phah a ni," an ti a; hma laksak turin FCSCA Minister an ngen.

FCSCA Minister chuan, e-POSS machine hmanga buhfai sem chu a buaithlak thu sawiin, "Signal a awm loh chuan offline-a sem a ngai. NFSA-ah e-POSS machine hmanga sem hman tur tih a ni a, signal awm lohna hmun tam tak a awm," a ti a, signal awm lohna hmun offline-a sem theih turin hma an lak tur thu a sawi a ni.