Assam Rifle hmuna mimal LSC-te Cancel ngei tum a ni - LRS Minister

Land Revenue & Settlement (LRS) minister Lalruatkima chuan, Aizawl khawpui lailia Assam Rifle hmuna mimalin LSC an neihte chu tihtawp (cancel) ngei an tum thu nimin khan Assembly House a hrilh.

ZPM member VL Zaithanzama zawhna kal zelah LRS Minister chuan, Council of Minister-in AR hmuna mimal LSC-te chu cancel tura an rêl tawh thu sawiin, "Chief Secretary hoin hmalak dan tur rèl a ni. Hetih lai hian, Central YMA-in PIL an thehlut a, hearing neih turin a awm mek. Cancel ngei turin buaipui mek a ni a, PIL hearing nghah a ni," a ti.

Lalruatkima sawi danin, land acquisition thil leh private ram luahsak avanga sorkar court-ah a chak loh avangin kum 2019-2020 chhungin Mizoram sorkarin cheng nuai 250 a sêng a ni.

Sorkar sum sênna chu - UDPA department-in Edenthar Venga Hawngṭial rama BSUP building sak avangin land acquisition compen­sation atan cheng nuai 88.84 a séng a, PWD pawhin Mizoram University kawngah court-in ram hlutna tihpun a remtih avangin cheng nuai 161 a séng bawk.

Tun dinhmunah LRS department hnuaiah court case (civil) chinfel loh 1,863 a awm a, dispute case fel lo 1,804 vel a awm anga ngaih a ni.