Lawngtlai district-a bank hnathawh thlirho

Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) chu nimin khan an chairman Dr Andrew H Vanlaldika, bawrhsap hoin DC conference hall-ah an ṭhu a, an district-a bank hrang hrangte hnathawh dan an thlirho.

Bawrhsap hian bank behchhana hmalak theihna tur ruahmanna, 'Potential Linked Credit Plan 2021-22' a tlangzarh nghal a ni.

Meeting-ah hian July-December 2020 chhunga Lawngtlai district-a bank hrang hrangte hnathawh dan, hmachhawp leh hmalak zui dan turte sawiho a ni a; bank leh mipui sum vawn himna lam te, pawisa léng vel (currency management & remittance) chungchang te, khua leh tuite hamṭhatna atana sorkar laipui ruahmanna hrang hrang - PMAY (Housing for All), women self help group, loan chi hrang hrang leh social security scheme lama bank hmalak dante an sawiho a ni.

Bank-in pawisa thîr an dawng duh lo ṭhina sawi chu thil hriat chian loh vang a nih thu tarlangin meeting chuan, pawisa thir, a bikin Rs. 10 thir chu dawng hreh lo turin dawrkaite an ngen.

Ṭhutkhawmah hian lead bank district manager (Siaha & Lawngtlai) Lallawmkima leh NABARD Lungleia district deve­lopment manager Evan T Munsong bakah, Reserve Bank of India aiawh, bank hrang hrang leh line department aiawhte an tel a ni.