Myanmar ráltlân thawn lêt dawn lo CM Zorama leh Amit Shah an inbia

Myanmar buaina avanga raltlan an awm chungchangah hian Union Home minister Amit Shah leh Union Defence minister Rajnath Singh-te chuan chief minister Zoramthanga an be tawh a ni.

Union Home minister Amit Shah leh CM Zoramthanga an inbiak thu hi Zoramthanga instagram story-ah tarlan a ni a, "Union Home minister Shah chuan Mizoram CM Pu Zoramthanga a rawn bia a, Myanmar aṭanga refugee Mizorama rawn lutte chu thawn lêt an nih dawn loh thu a rawn hrilh ta. Mipuite ṭawngṭaina Pathianin a chhang niin a lang e," tih a ni. 

Vanglaini thu dawn danin, Chief Minister hian Union Home Minister hnenah hian Myanmar aṭanga rawn lutte chu Zo hnahthlak, Mizo unaute tho an nih thu a hrilh a, "Keini tan chuan mi hrang an ni lo. Ei leh in tur leh chenna tur kan lo pe a ni," a ti.

Amit Shah chuan, ráltlante an enkawl dan Zoramthanga'n a hrilh chu ṭha lo tihna a nei lo a, chhunzawm zel a phalsak a ni. Hetih lai hian, raltlan chhungte'n an tawrh theih avangin Mizoram sorkar chuan ráltlân chungchang tihdarh vak ṭha a ti lo.

Rajnath Singh chuan, Myan­mar boruak chungchangah March 10, Nilaini zan khan Chief Minister a bia a, an sawi dun erawh hriat a ni lo. 

Vanglaini-in thu a dawn chinah nimin thleng khan Myan­mar buaina avangin Mizoramah mi 23 an rawn lut tawh. An zinga mi 19 chu Serchhip dist.-ah lutin, pali chu Champhai dist.-ah an lut a ni. 

Serchhip district-a lut mi 19-te chuan Lungkawlh khua bêlin, khawtlangin an lo buaipui a, an zingah naupang pali leh hmeichhia pali telin, nau pai mekte pawh an awm. Mi 19 zinga pathum chu khaw dangah sawn an ni tawh thung. Raltlante enkawl nan hian Lungkawlh VC-te sum hman a nih bakah, YMA leh khawtlang mipuiin pawisa an thawh khawm a ni.