Assembly-a bill pass 14 zinga pakhat Governor-in a la pawm thei rih lo

MNF sorkar hnu, kumin March thlaa Legislative Assembly session-a dân thar 14 pass zinga 13 chu Mizoram Governor Prof. Jagdish Mukhi-a'n a pawmpui tawh a, pakhat erawh chu April 18, 2019 thleng khan a la pawmpui thei lo a, la zir chian a duh vang nia thu dawn a ni.

Mizoram Legislative Assembly pariatna session vawi hnihna, kumin March thlaa neihah khan bill 14 pass a ni a, chu'ng bill-te chu dân angin Assembly Secretariat chuan Governor pawmpui turin an thawn nghal vek a ni. Governor chuan bill 14 zinga 13-te chu March 26, 2019 khan a rualin a pawm a, Assembly Secretariat-ah a thawn let leh vek tawh.

Bill-te chu Governor-in 'assent' a pek hnuah 'act' a ni tawh. Assembly Secretariat-in a dawn lêt tawh 13-te chu Law & Judicial department-ah an thawn leh a; Law & Judicial department chuan kar kal ta thleng khan Assembly Secretariat-ah 10 an thawn let tawh a, pathum an la thawn let hman lo.

Hetih lai hian, Mizoram Assembly House-in bill a pass zinga pakhat, 'The Mizoram Maintenance of Household Registers Bill, 2019' chu Governor Prof. Jagdish Mukhi chuan a la pawmpui lo a; a la pawm loh chhan chu, la zir chian a duh vang ni a thudawn a ni.

Assembly Secretariat hotute sawi danin, MLA-te'n Assembly session-a dân an pass-te chu Governor-in a duh chuan India President hnenah a thawn thei a, zir chian a duh chuan a zir chiang phawt thei a, a tikhawtlai thei bawk. 

Governor-in dân a pawm dawn leh pawm dawn lo chu Assembly Secretariat-ah ziakin a hriattir ngai lo. Chutih laiin, money bill erawh chu Governor-in a pawmpui sa a nih avangin pawm saa ngaih a ni thung.

Mizoram Assembly bill pass tawh Governor-in a la pawm loh, 'The Mizoram Maintenance of Household Register Bill 2019' hi General Administration Department (GAD) bill a ni a, phek li-a chhah a ni. Kumin March thlaa Mizoram Assembly session-a bill pass-te chu a hnuaia mite hi a ni a; serial no. 2 hi Governor-in 'assent' a la pek loh chu niin, serial no. 5, 6 leh 11-te hi Governor-in a pawm hnua Assembly Secretariat-in Law & Judicial department-a an thawn tawh, an la dawn let lohte a ni.