R. Vansangkimi - India ram pumah 2-na a ni

R Vansangkimi d/o R Lalbiakdika, Chaltlang High School-a pawl 9 zirlai chu INTACH Headquarters-in a buatsaih, pawl 6-9 inkar tana 'My Water Heritage’ tih thupui hmanga National Essay & Painting Competition-ah pahnihna a ni.

INTACH Mizoram Chapter convener P Rohmingthanga hnen aṭanga thu dawn danin, INTACH hian My Water Heritage tih thupui hmangin zirlaite tan state tinah kum tin intihsiakna an buatsaih ṭhin a, Mizoramah pawh Chaltang High School-ah January 19, 2019 khan INTACH, Mizoram Chapter leh Directorate of School Education-in an buatsaih a ni.

Mizoram state level-a intihsiaknaah hian zirlaite'n an state chhunga lui/dil an duh ber thlangin, a lem leh essay ziakin intihsiakna an hmachhawn a, intihsiaknaa telte lemziak leh essay ziahte chu New Delhi-a INTACH hmunpuiah thawn khawmin, expert-te'n an endik ṭhin.

Intihsiaknaah hian kuminah chuan India ram pumah zirlai 14,000 vel an tel a; a ti ṭha zual 10-te chu national winner dawng tura thlan a ni a, a ti ṭha zual 10 zingah pawh R Vansangkimi chu pahnihna a ni. Intihsiaknaah hian R Vansangkimi hian Buangpui khaw rama 'Tuirihiau' lem leh chanchin a ziak a ni. 

Lawmman hlanna programme chu July 3-5, 2019 chhungin Ahmedabad, Gujarat-ah neih a ni dawn a, Gujarat-a hmun pawimawhte fanpui nghal an ni ang. INTACH Mizoram Chapter chuan, Mizo zirlaite'n pipute hmun hlui leh hlun vawnhim leh enkawl chungchangah ṭhahnemngaihna rilru an nei zel chu lawmawm an tih thu an tarlang a; India ram pum intihsiaknaa R. Vansangkimi pahnihna a ni thei chu an chhuan thu leh Mizoram tihmingṭhatu a nih thu an sawi bawk.