Mihringa sumdawnna zir chiang tur Central YMA-in Study Team a din

Central YMA chuan, mihring hmanga sumdawnna (human trafficking) kalkawngah Mizoram hman mek nia hriat a nih avangin, zir chianga hma latu tur Study Team an din.

YMA Central Executive Committee (CEC) member-te CYMA president Vanlalruata kaihhruaia April 29, Thawhṭanni zana CYMA Committee Room-a ṭhukhawm chuan, human trafficking kalkawnga Mizoram hman mek nia hriat a nih avangin hma la tur Study Team a din a, convener chu CYMA general secretary Lalhmachhuana a ni. Member atan CEC member dang - Lalhmangaiha, Zochhuana, MS Ralte leh Lalhmuchhuaka an ruat.

Vanglaini palai zawhna chhangin CYMA President chuan, Champhai YMA-te hnen aṭangin Zokhawthar kaltlangin hnam dang (Nepali) eng emaw zat chu Myanmar lamah an lut tih report an dawn thu a sawi a, "Hnam dangte hi hmeichhia vek an ni a, kum 16-20 inkar vel an ni hlawm a, mi 200 chuang Myanmar-ah hian an lut hman. Champhai YMA-te'n an hnawh darh hnuah an rêm deuh a, a hnuah an rawn inlár leh a ni," a ti.

Vanlalruata chuan, human trafficking chungchangah Mizoram Police hotute pawh an bia a, Vairengte Police checkgate-ah fimkhur a ṭul thu an thlen tih a sawi. CEC meeting-ah hian tlawmngai pawl lian dang pakhat chhungkaw buaina chungchanga an hmalak tawhnate tarlan a ni a, remna a awm theihna atana hmalak ni se an ti a, a ṭul anga bawhzui tur an inruat. Hma la tur hian convener-ah CYMA vice president R Lalngheta ruat a ni a, member-te chu CEC aṭangin Lalbiakzuala, Lalrammuana, Roneihthanga leh Jeffrey L Fanai te ruat an ni.

Aizawl khawpuia chengte tan thlànmual inṭâwm (common cemetery) neih a nih theih nan a ṭul anga zir chiang tur pawh an ruat a; convener-ah CYMA assistant secretary Peter Chhakchhuak, member-ah Lalrinmawia Sohnel, RL Zidinga, K Darthantluanga, John Kima leh Lalrinmawia te an ruat a ni.