KHAWTHLIR

Champhai Zote Branch YMA chuan an branch diamond jubilee lawmna pualin nimin khan blood donation camp an huaihawt a, Champhai District Hospital tan thisen unit 23 an pe a, a petute mipa 20 leh hmeichhia pathum an ni.

Traffic SP Roding­liana Chawngthu chuan thupek chhuahin, SIPMIU-in kumin May 1 thla chhungin PWD Tlang, Ramhlun Venglai (PWD Highway Division Office) leh Pema Road, Ramhlun North (DIET internal road) inkar kawngpuiah tui pipe phûm hna an thawh dawn avangin, hna thawh hun chhungin lirthei reng reng tlân phal a ni dawn lo tih a tarlang a, "Hna thawh tibuai thei turin kawng sirah lirthei dah phal a ni lo," a ti bawk.

PWD chuan thu­chhuah siamin, India rama bailey bridge siamtu company hlun leh lian Garden Reach Shipbuilders & Engineers (GRSE)-a engineer-te chah chhuakin, nimin aṭang khan Mizorama bailey bridge-te endik hna thawh ṭan a nih thu an tarlang. PWD chuan, "GRSE engineer-te hi a bialtu EE/SDO-ten an lo ṭawiawm a, PWD Bridge Cell-a bridge engineer-in a ṭanpui reng bawk ang. An hmuh dan leh tihchak dan ruahmanna E-in-C hnenah thehlutin, a tul anga hmalak zel dan tur sorkarah thlen a ni ang," an ti.

Art & Culture department chuan nimin khan Thenzawl Joint YMA Hall-ah Archives & Museum Exhibition cum Book Sale Programme an buatsaih a, Thenzawla tlawmngai pawl hruaitute leh sikul hrang hranga zirlaite an tel. Exhibition-ah hian Mizoram State Museum leh Mizoram State Archive-te'n an thil neih hrang hrangte an pho­lang a ni.

Vawiin chhun dar 12 hian Information & Public Relation department chuan an directorate auditorium-ah press accreditation card sem chhuah inkhawm an buatsaih dawn a, thuthar thehdarhtute tel turin 

an ngen.