Pangang chi khatin vaimim a tihchhiatsakte Chhawmdawlna tur Central-ah dil dawn

Agriculture minister C Lal­rinsanga chuan, pangang chi khat, Fall Armyworm (FAW)-in Mizorama vaimim a tihchhiatsakte chhawmdawlna atan sorkar laipuiah ṭanpuina dil a nih dawn thu a sawi.

Thuthar thehdarhtute zawhna chhangin Agriculture Minister chuan, tun hmaa hriat ngai loh fall armyworm vanga loneitute'n harsatna an tâwk chu vanduai­thlak a tih thu sawiin, "He rannung vang hian USA pawhin harsatna an tawh phah tawh. Kum 2018 khan India ramah a rawn lut a, Mizoramah chuan tun hnaiah vaimim hmunah an rawn inlár a ni," a ti.

C Lalrinsanga chuan, fall armyworm doin theihtawp an chhuah tih sawiin, "Theihtawp kan chhuah zel dawn a, buh hmunte a thleng a nih chuan a buaithlak lehzual dawn. DAO-te chu an huam chhungah fall armyworm-te an inthlah pun hmain tihrêm tum turin kan hriattir a, hmun hrang hrangah theihtawp chhuah mek a ni," a ti a; fall armyworm vanga harsatna lian zawk a thlen loh an beisei thu a sawi.

Agriculture Minister chuan, FAW chu vawi leh khatah a inlár rual ṭhup tih sawiin, "Hmun hran hranah a rualin an inlár a, chumi hmunah chuan a rawn inlár leh ta tih tur a awm chuang lo. A thlen belh zel dawn leh dawn loh kan hre lo a, tun dinhmunah chuan a ruala a thlen ṭhupnaah bak harsatna thar a awm lo," a ti.

Fall armyworm vanga harsatna tâwkte chhawmdawl an nih theihna atan hma an lak dawn thu sawiin Agriculture Minister chuan, "Central-ah disaster a nih thu thlenin, loneitute chhawmdawl dan kawng kan zawng dawn a ni," a ti a; crop damage (eizawnna thlai chhia) chu sorkar laipuiin a ngaih pawimawh ṭhin avangin an dilna chu a hlawhtlin ngei an beisei thu a sawi.

Agriculture department pawhin thuchhuah siamin, fall army­worm chu Mizoramah kumin March thla chawhnu lamah hmun ṭhenkhatah hmuh a nih thu an tarlang a, "Heng rannung hian tun dinhmunah vaimim a bei ber a, hun rei lo te chhungin Mizoram hmun hrang hrang aṭangin nasa takin vaimim a bei tih report dawn a ni," an ti.

Agriculture department tarlan danin, April 13, 2019-ah fall armyworm puan thu TV local channel kal­tlangin mipui hriat atan tarlan a ni a; tun dinhmunah vaimim chìnna hmun a tih­chhiat zau zawng report tawh chu hectare 1,409-a zau a ni. District Agriculture Officer, KVK leh ATMA-a thawkte'n an awmna district ṭheuhah vaimim chìnna hmun fang chhuakin, fall armyworm-in a tih­chhiat dan an endik a ni.

Agriculture department chuan, fall armyworm beihna atana hmanraw ṭangkai chemical pesticide, sprayer leh a dangte a mamawh hnenah an pe chhuak mek zel. FAW beihna atan hian mumal zawka hmalak a nih theih nan State Level Fall Armyworm Rapid Response Team din a ni tawh.

State Level FAW Rapid Response Team hian fall armyworm beihna atana ṭul hrang hrangte a ngaihtuah a, research institute hrang hrangte nen thawkho thei turin hma a la dawn. Fall armyworm vanga harsatna neite chu DAO-ah report zel tura ngen an ni.