Birth & Death Registration sawiho

Mizorama Civil Registration of Births & Deaths kalphung enkawltu committee sang, Inter Departmental Coordination Committee (IDCC) chu April 29, Thawhṭanni khan Planning secretary Dr C Vanlalramsanga hoin Aijal Club-ah an ṭhukhawm a; birth & death registration kalphung siamṭhat ngai laite an sawiho.

Mizoramah misual tute emaw vanga birth certificate dik lo leh dan loa nei hmuh tur leh man tur a awm ṭhin tihreh dan tur an sawiho a; certificate danglam bik, a lem siam theih mai mai loh hman leh certificate nei tawh zawng zawng pawh thlaksak vek an rel. Birth certificate thlak tur hian hun a duh rei deuh dawn a, sum tam tak a ngai dawn bawk tih hre chungin a thuphungin kalpui an remti a, sorkarah rawtna thlen an rel a ni.

Birth certificate leh death certificate chu dan dik lo hmanga neih tum an awm ṭhin chungchangah mipui an fimkhur a ṭul thu leh thawktute pawh an fimkhur lehzual a ṭul thu an sawi a; certificate lem dan loa neitute leh a pe chhuaktute chu dan anga hrem zel a pawimawh thu an sawi bawk.

Mitthi tana death certificate pawh rokhawm chungchangah leh thil dang atana document pawimawh a nih avang­in, a dawng leh la chhuaktu tur dik tak hnena pek chhuah a nih theih nan leh, khauh zawka kalpui a nih theih nan mitthi register theih dan leh kaihhruaina siam remtih a ni.