ZPM MLA-te'n Emergence 2019 an tlawh

ZPM Legislature Party (ZLP) leader Lal­duhoma leh ZLP secretary Dr Vanlalthlana te chuan April 29, Thawhṭanni khan Mizoram University Incubation Centre-in Dawrpui Multipurpose Centre-a 'Emergence 2019' an buatsaih an tlawh a, mahni kutkawiha eizawnna insiam­tu (entreprenuer)-te leh ṭhalai lehkhathiamte nen an inkâwm.

ZPM MLA-te hnenah hian entrepreneur-te chuan an harsatnate an lo sawi a, MLA-te chuan an tih theih chinah hmalakpui zel an inhuam thu an hrilh. Entrepreneur-te chuan, thawh chhuah tam zawk (mass production) nei thei tur leh market intervention leh penetration lam atan sum (working capital) duh thála hman tur neih an châk thute an lo hrilh bawk.

Lalduhoma chuan, ZPM manifesto - 'Handholding Policy (bána kaih) hmangin an harsatna aṭanga khai chhuah leh ṭanpui an chak thu sawiin, Pathian leh mipuite zar­ah sorkarna an chan hun­ah chuan kawng hrang hranga puih ngai leh puih tlakte chu thlei bik nei hauh loa an puih dawn thu a sawi. Dr Vanlalthlana pawhin, entrepreneur-te'n Mizoram economy nasa takin an chawi sang thei dawn nia a hriat thu a sawi a ni.

Emergence 2019 hi nimin khan chhunzawma zawh a ni a; Mizo entrepreneur-te'n an thil siam chhuahte an pho chhuak a, mi ṭhahnem takin an tlawh a ni.