Governor-in ṭanpuina pek/dawn dan Vil uluk turin officer-te a chah

Governor Prof. Jagdish Mukhi chuan April 30, Thawhlehni tlai khan Raj Bhavan-ah sorkar department hrang hrang hotute a kâwm a, sorkar laipui aṭanga ṭanpuinate a dawng tur dik takin an dawng em tih vil zui turin a chah.

Larsap hian officer-te chu centrally sponsored scheme (CSS) kalpui dan a sawipui a, "Sorkar laipui aṭanga hmasawnna hna thawhna tur sum lo kalte hi a dawng tur dik takin an dawng em tih te, a dawngtute'n an hmang ṭangkai em tihte uluk taka vil zui tur a ni. State chhung hmun kilkhawr zawkte tlawh a, harsatna an tawhte hmuhpui a, a chinfel dan ngaihtuah hi ka ngai pawimawh," a ti.

Sorkar laipui hmalakna, kum 2022-ah chuan lo neitute thar chhuah a lêta tihpun tumna 'Doubling Farmers Income by 2022' tihlawhtling turin district tinte kum khat chhunga an hlen chhuah tur bituk siamsak a pawimawh tih sawiin Governor chuan, "Hemi hlawhtlinna atan hian district tin aṭanga vil hneh a ṭul," a ti a; agriculture leh a kaihhnawih department dangte'n thawhhona ṭha an neih a ṭul thu a sawi.

Prof. Jagdish Mukhi chuan, sorkarin a kalpui mek Mission Organic Mizoram leh Diversification of Crops chu ṭha a tih thu sawiin, "Sorkar hnathawkte leh lo neitute ṭhahnemngaihna avangin kum 2022-ah chuan Mizoram leh hmarchhak state danga lo neitute thar chhuah a lêta a pun hman ngei ka beisei," a ti.

Inkawmnaah hian PHE, Power & Electricity, Food Civil Supplies & Consumer Affairs, AH&Vety, Horticulture, Irrigation & Water Resources department-a secretary, engineer-in-chief, chief engineer, director leh officer dangte an tel.

Governor hian Thawhlehni tlai vêk khan Mizoram University vice chancellor Prof. KRS Sambasiva Rao leh MZU hotu dangte a kâwm bawk a; MZU inkaihhruaina leh hnathawh dan kalhmang ṭha a tih thu a sawi. Tun dinhmunah MZU hi National Institutional Ranking Framework (NIRF)-ah 76-na a ni mek a, National Assessment and Accreditation Council chuan Grade A a pe a ni.