State Games hmangin ṭhalaite talent Hai chhuah kan beisei - Sports Minister

Sports & Youth Services minister Robert Romawia Royte chuan, Mizoram State Games hmangin infiamnna lamah Mizo ṭhalaite talent hai chhuah theih an inbeisei thu a sawi.

Thuthar thehdarhtute zawhna chhangin Robert Romawia chuan, infiamna discipline pahnih khat ringawta ṭhat a tâwk loh thu a sawi a, "State Games kan neih loh avangin discipline tam tak an muthlu rei tawh. State Games kan nei lo hi kan tuar rei tawh hle a, tuna kan buatsaih tur hmang hian Mizo ṭhalai tam takte talent kan hai chhuah ngei kan ring," a ti.

Sports Minister chuan, Mizote chu infiamna lama kan insâwrbingna a tlem lutuk tih sawiin, "State Games kan buatsaih dawn avang hian tunah pawh mi tam tak chu an phûr tawh hle. Olympic Games, National Games leh North East Games-te a awm a, insàwrbingna discipline kan neih tlem avangin North East Games-ah pawh Mizote kan che ṭha thei lo," a ti a, State Games-ah  discipline tam thei ang telh an tum thu a sawi.

Robert Romawia sawi danin, State Games buaipui turin state level-ah chuan Sports Minister kaihhruaina hnuaiah State Games Implementation Committee leh Sports Secretary kaihhruaina hnuaiah Organising Committee din a ni a; district level-ah chuan DC-te kaihhruaina hnuaiah committee din a ni ang. Committee hrang hrangte hian State Games kalpui dan tur an rêl dawn a ni. Tarlan tawh angin, Mizoram sorkar chuan State Games buatsaihna atan hian kum 2019-20 budget-ah cheng nuai 150 a dah a ni.