Press accreditation card sem
Information & Public Relations department chuan nimin khan an auditorium-ah kum 2019 aṭanga 2021 thlenga accredited journalist ni turte hnenah press accreditation card semna inkhawm an buatsaih a; Press Accreditation Committee chairman Sangdingliana, IPR secretary-in a hmanpui.
Sangdingliana chuan, accredited journalist ni tura Press Accreditation Committee-in uluk taka a thlan chhuah, accreditation card dawngtute chu a lawmpui thu a sawi a, ṭangkai taka hmang turin duhsakna a hlan. Journalist-te chu an thuziah leh puanzarin ram inrêlbawlna thlenga nghawng a neih theih avangin, an pawimawhna hre thar tur leh an thuziahte uluk lehzuala endik turin a fuih.
IPR director David L Thangliana, Press Accreditation Committee secretary ni bawk pawhin thu sawiin, "Accredited journalist-te chu an dinhmun a pawimawh avangin journalist zingah pawh uluk taka thlan chhuah an ni," a ti a; accredited journalist-te chu sorkarin hamṭhatna a pek thu leh, accredited journalist-te chu zahawm taka an invawn a pawimawh thu a sawi.
MJA president Zonunsanga Khiangte chuan, accredited journalist ni tura sorkarin a thlante chu sorkar hmalakna leh thil pawimawh puanzar te, sorkar ni pawimawhte an ngaih pawimawh a ṭul thute a sawi bawk. March 7, 2019-a Press Accreditation Committee ṭhukhawm chuan Mizoram sorkara accredited journalist ni turin Mizoram puma journalist 141 a thlang a; Aizawl district aṭangin mi 60, Lunglei district aṭangin mi 19, Saiha district aṭangin mi 12, Champhai district aṭangin mi 13, Kolasib district aṭangin mi 12, Serchhip district aṭangin mi 10, Lawngtlai district aṭangin mi pariat leh Mamit district aṭangin mi pasarih thlan an ni. Press accreditation thar chu April 2019 aṭanga March 2021 thleng nung tura tih a ni.