Mizoram thingtlang khua 725-ah Chhungkua 1,28,681 leh mi 6,45,889 awm

Economics & Statistics department-in khaw dinhmun an zir chianna hrang hrang an tarlanna, 'Village Profile & Development Indicators 2017-2018 : Mizoram State' tih lehkhabu, April 29, 2019-a an tihchhuah taka a lan danin, Mizoramah thingtlang (rural) khua 725 a awm a, chu'ngah chuan chhungkua 1,28,681 awmin, mi 6,45,889 an chêng.

Mizoram thingtlang khua 725-a chhungkua 1,28,681 zinga 25.17%, chhungkua 32,385 chu in ṭha vak lo (kacha house)-a cheng an ni a; a zatve aia tlem hret, chhungkua 60,681 (47.16%) chu tlangram loneih (jhum cultivation)-a innghat niin, leilet neia eizawng chhungkua 10,166 (7.90%) an awm.

District hrang hranga thingtlang khuaa cheng, in ṭha vak lo (kutcha house)-a la khawsa tam lamah Lawngtlai district sang berin, 51.31% an la khawsa a, Mamit district (42.67%)-in a dawt. Kutcha house-a la khawsa Champhai district-ah an tlem ber (2.08%) a, Serchhip district (2.19%) leh Aizawl district (3.05%)-in an dawt a ni.

Mizorama thingtlang khua 725 zinga 673 chu motor kawngpuiin a pawh a, khaw 52 erawh chu lirtheia tlawhpawh theih a ni lo. Khaw 219-ah Mizoram pum huap ni tin chanchinbu a thleng thei a, thlen lohna khua 506 a awm. Cable network service neih khua 361 an awm laiin, la nei lo khua 364 an awm a ni.

Khaw 725 zinga 659-in kawlphetha (electricity) an nei a, khaw 66-in an la hmu pha lo thung a; Mizorama thingtlang khua zawng zawng zinga 90.90%-in kawlphetha an nei tawh a, 9.10%-in an la nei lo. Chutih laiin, health sub-centre la nei lo khua an la tam zawk a; khaw 304-in an neih laiin, khaw 421-in an la nei lo.

Zirna lamah, khaw 710-in primary school an nei tawh a, chu chu 97.93% an tling a, primary school pawh la nei lo khua 15 (2.07%) an la awm. Middle school nei khua 636 leh la nei lo khua 89, high school nei khua 323 leh nei lo 402, higher secondary school nei khua 54 leh nei lo 671 an awm bawk.