KHAWTHLIR

Mizoram Board of School Education (MBSE) chuan vawiin chawhma dar 11 hian High School Lea­v­ing Certificate (HSLC) Examination 2019 result a tichhuak dawn. Result hi Chaltlanga MBSE Office kawtah en theih a ni dawn a, result bu lei nghal theih a ni ang. Result hi MBSE website www.mbse.edu.in ah pawh en theih a ni dawn.

Mizo National Women Front (MNWF) chuan thuchhuah siamin, MNF policy SEDP (Policies & Programmes)-ah 'Women and Child Development (Hmeichhiate leh naupangte dinhmun tihhmasawnna)' duan, Cabinet meeting-in a pawm ta chu lawmawm an tih thu an tarlang a, "Women & Child Development chu office hran neia a function mai tur hi kan lawm hle a, CM Zoramthanga, Social Welfare minister Dr K Beichhua leh Cabinet chungah kan lawm em em a ni," an ti.

Hnahthial Officers' Club (HOC) chuan nimin khan Hnahthial Higher Secondary School-a pawl 9 - 12 zirlaite tan hma lam hun inkawhhmuhna, career guidance an buatsaih. Career guidance hi HOC president V Lalzamvela'n a kaihruai a, Hnahthial BDO H Lalramliana, PHE SDO Jerome Lalrem­tluanga leh KVK scientist (Horticulture) Zosang­liani Varte ten zirlaite hma lam hun atana thil pawimawh hrang hrang an zirtir a ni.

Social Welfare minister Dr K Beichhua chuan nimin khan Bengaluru-a Mizoram House-ah Northeast Solidarity in Bangalore hruaitute a kâwm a, an pawl hmalakna chu ropui a tih thu hrilhin, "Mizo ṭhalai hna zawng laite tan state sorkar a inhawng reng a ni," a ti. Northeast Solidarity in Bangalore hi kum 2012-ah Bengaluru-a India hmarchhak mite'n enhranna leh tihduhdahna nasa tak an tawh vanga din a ni a, buaina leh harsatna hrang hrang nei mi eng emaw zat an lo buaipui tawh a ni. 

Mamit DC Dr Lalrozama hoin Mamit District Agriculture Office-a thawktute'n nimin khan Mamit Hmunsam thlànmual bula vaimim chìnna hmunah fall armyworm-in vaimim a eichhiatte an enfiah. Sorkar thuchhuah tarlan danin, vaimim eichhe­tu pangang hi Mamit district-ah chuan April, 2019 vel aṭangin a lut nia hriat a ni.