RUSA officer pension hun tawh rawih chhunzawmna notification sût leh a ni

RUSA-a additional state project director (ASPD) Thanglura, April 30, 2019-a pension tur chu Mizoram sorkarin thla ruk atana rawih chhunzawmna tur notification (Dt. 30/04/2019 (Letter No A.40012/1/2015-HTE) a chhuah. RUSA ASPD rawih chhunzawmna notification chu nimin khan sorkarin a sût (cancel) leh nghal thu an dawng tih MSU President Vanllalliana chuan Vanglaini a hrilh.

MSU thuchhuah tarlan danin, sorkar hnathawk pension hun tawh rawih chhunzawm an duh loh avangin, RUSA-a ASPD pension hun tawh service hun pawhseisak chu cancel leh nghal a nih theih nan MSU hruaitute'n an president Vanllalliana Khiangte hoin nimin khan chief minister Zoramthanga an hmu a ni.

Chief Minister an hmuh zawhah RUSA Office-ah Thanglura hmu lehin, amah rawih chhunzawmna tur hriattirna chu pawm lo turin an ngen. MSU chuan, Chief Minister-in MSU ngaihdan leh duh dante ngun takin a ngaih­thlaksak tih sawiin, "Chief Secretary nen an sawi dun tur thu leh a ṭul anga hmalak a tum thu a sawi a, vawiin ngeia order hi cancel a nih tur thu min hrilh avangin MSU chuan Chief Minister zahawm tak chungah lawmthu kan sawi a ni," an ti.

Sorkar hnathawk pension tawh rawih nawn leh pension hun tawh rawih chhunzawm chuan ṭhangthar, mithiam tam tak tan hna zawnna kawngah harsatna a thlen ṭhin avangin ṭha an ti ngai lo tih sawiin MSU chuan, "An department enkawlah thiamna bik nei leh project khawih laklawh lai neite erawh hriatthiamna thui tak kan nei thung," an ti a; RUSA ASPD rawih chhunzawm tum erawh mi bik leh thiamna bik nei a nih loh avangin an dodal tih an tarlang.