Society anga MIMER kalpui zel A ṭhat leh ṭhat loh zirchian a ni

Mizoram sorkar chuan Mizoram Institute of Medical Education & Research (MIMER) chu society anga kalpui zel a ṭhat leh ṭhat loh zir chiangtu tur committee a din a, committee chuan an zirchianna an zo tawh.

Vanglaini palai zawhna chhangin Health secretary H Lalengmawia chuan, Mizoramin medical college a neih chu a tìr tê a la nih avangin thawktu lamah pawh thuam famkim a la nih loh thu a sawi a, "Thawktu tam tak chu contract-te an la ni. Society anga kalpui ni mah se, a zawng zawngah society ang tak taka kalpui a ni chuang lo," a ti.

Health Secretary sawi danin, zir chiangtu committee din chhan chu society anga MIMER kalpui a ṭha loa hriat vang a ni lo. Committee chuan society anga kalpui a nih chuan, a pumpuia society ang tak taka kalpui law law nge ṭha zawk, society anga kalpui loh law law tih an zirchiang a ni.

Zir chiangtu committee-ah hian chairman chu Finance secretary Vanlalchhuanga a ni a, member secretary chu Health principal director Dr F Lallianhlira a ni. Member-ah chuan an thil zir chian tura a kaihhnawih department hrang hrang aiawhte an tel. Committee hian zir chianna thawk zo tawh mah se, an zirchianna chu sorkarah an la thehlut lo.

An zirchianna hi sorkarin a en chian hnuah Cabinet-ah thehluh a ni ang a, anni'n thutlukna an siam dawn a ni. Zawhna chhangin Health Secretary chuan, MIMER hming Zoram Medical College tia thlak a nih thu Medical Council of India (MCI) hnenah hriattir a la nih loh thu a sawi a, "MIMER hming thlak a nihna hi notification-a tihchhuah a la ni lo a, tihchhuah a nih hunah a ṭul angin kan bawhzui ang," a ti. Cabinet meeting chuan MIMER chu Zoram Medical College tia thlak a lo remti tawh a ni.

MIMER hi August 7, 2018-ah khatih laia chief minister Lal Thanhawla'n a hawng a, a hnuah MBBS zirna kalpui chhunzawm nghal a ni.