MCS atan mi 12 an tling
Mizoram Public Service Commission (MPSC) chuan nimin khan Mizoram Civil Service (MCS) Junior Grade tur lakna a buatsaiha final result a tichhuak a, mi 12 tlingin, Dr Laldinsangi, Mission Vengthlang pakhatna a ni.
Mizoram Civil Service Competitive Examinations-ah hian November 5- 9, 2018 chhungin main exam neih a ni a, kumin April 30 aṭang khan personal interview neiin, nimin khan zawh a ni a, result tihchhuah nghal a ni. MCS atan hian mi 12 an tling a, panel list-ah mi panga an awm.
MCS-a pakhatna Dr Laldinsangi d/o C Laldina, Mission Vengthlang hi St. Mary's College, Hyderabad-a B.Sc. (Biotechnology) a pass hnuah University of Hyderabad aṭang thoin M.Sc (Animal Biotechnology) a zo a; University of Hyderabad aṭang vekin Animal Science-ah doctor of philosophy zoin, Mizoram University-a guest faculty ni mek.