HSLC 2019-ah zirlai 11,783 an pass Pass percentage tlahniam; top 10-ah Mizo vek

Mizoram Board of School Education (MBSE) chuan nimin chawhma dar 11 khan High School Leaving Certificate (HSLC) Examination 2019 result a tichhuak a, zirlai exam 17,346 zinga 11,783 an pass a, pass percentage chu 67.93% a ni. Kumina pass percentage hi nikum 2018-a pass parcentage 76.65% aiin a hniam.

HSLC 2019-ah hian pakhatna chu Lalrinnungi d/o Zothantluanga, Sihphir Neihbawih, St. Joseph Higher Secondary School, Aizawl a ni a; a ti ṭha zual sawm (Top 10)-ah zirlai 20 an lang a, Mizo vek an ni. Kumin HSLC Exami­nation-ah hian exam hma­chhawntu zirlai 17,346 awmin, nikum (17,695) aiin an tlem hret a; regular student 17,046 leh private-a exam mi 300 an ni. Pass zawng zawng zirlai 11,783 zingah hmeichhia tam zawkin 6,005 an ni a, 5,778 chu mipa an ni. Regular-a exam zingah 11,687 (68.56%) pass in, private candidate 300 zinga 96 (32%) an pass.

Zirlai pass 11,783 zinga 1,177 chu distinction-ah an pass a, nikuma distinction-a pass 1,068 aiin a tam zawk. First division-ah zirlai 3,280, second division-ah 4,051 leh third division-ah zirlai 3,275 an pass. Compartmental chance nei zirlai 469 an awm a, zirlai 5,094 an fail a, fail zat hi nikum 2018 (3,787) aiin kuminah 1,304-in an tam zawk.

Compartmental chance neite tan MBSE chuan June 6, 2019-ah district khawpui tina centre pakhat ṭheuhah exam a buatsaih dawn a, May 17, 2019 thleng centre superin­tendent hnenah exam form thehluh theih a ni ang.

Compartmental exam buatsaihna turte chu Aizawlah Mizo High School, Mamit H/S, Kolasib-ah St. John HSS, Champhaiah GM H/S, Serchhip H/S, Lunglei H/S, Lawngtlaiah Region H/S leh Siaha H/S-te a ni.

Regular candidate bikah district hrang hranga zirlai pass percentage chu - Aizawl district-ah 80.98% (83.03%), Champhai district-ah 67.36% (77.48%), Kolasib district-ah 63.04% (68.99%), Lawngtlai district-ah 49.63% (59.15%), Lung­lei district-ah 64.14% (69.72%), Mamit district-ah 52.09 (66.44%), Ser­chhip district-ah 70.61% (78.42%) leh Siaha district-ah 45.12% (86.26%) a ni (Khualkhung chhunga mi hi nikuma pass percentage a ni).

Sorkar sikul aṭanga candidate zingah 60.97% an pass a, deficit school aṭangin candidate zinga 91.42%, aided school aṭangin candidate zinga 63.90%, lumpsum school aṭangin candidate zinga 59.06% leh private school aṭangin candidate zinga 72.33% an pass. HSLC candidate-te pass vekna sikul 72 (nikumah 105) a awm a, chutih laiin, zir­lai fail vekna sikul 24 (nikumah 15) a awm bawk.

Kumin HSLC-ah hian top 10-ah mi 20 an lang a; a pumpuia pakhatna Lalrinnungi s/o Zothantluanga chuan mark 500-ah 486 a hmu (nikuma pakhatnain mark 477 a hmu) a, Science subject-ah full mark a hmu. Science subject-ah hian full mark hmu zirlai panga an awm a, Mathematics-ah full mark hmu zirlai pakhat a awm. Kumin HSLC Exam­­ina­tion result hi kum 2016 hnu (kum li chhung)­-a a chhiat ber ṭum a ni.