KHAWTHLIR

Mizo Zirlai Pawl (MZP), Mizo Students Union (MSU), Students’ Self-Support Union (SSU), Zoram Peoples' Movement (ZPM) Ṭhalai leh National Students Union of India (NSUI)-te chuan a hran ṭheuhin HSLC Examination 2019 result chhuak chungchangah thuchhuah an siam a; HLSC pass tharte an lawmpui thu an tarlang. Pawl palite chuan pass-te chu an kal zelna turah duhsakna an hlan a, ram leh hnam tana chhenfakawm ni tura inzir zel tur­in an chah. Pass zo lote pawh beidawng loa zir zel tura an fuih rualin, an pass theih nan duhsakna an hlan a ni.

Mizo Writers Association chuan ṭawng danga ziah, Mizo ṭawnga lehlin lehkhabu kum 2018 chhunga chhuak zinga ṭha ber lawmman, Translation Book Award 2018 dawng turin 'Ilibagizia: Left to Tell' tih lehkhabu, Thankima lehlin an thlang. 'Ilibagizia: Left to Tell' tih lehkhabu ziaktu chu Pastor Murinzi a ni.

Traffic SP chuan thupek chhuahin, SIPMIU (NERCCDIP)-in April 22-26, 2019 zan dar 9 aṭanga zing dar 5 chhunga Chhinga Venga Lalrengmaia in bul aṭanga Chhinga Veng Bethany thleng pipeline leh manhole siam hna an thawh dawn vanga lirthei tlan khapna thupek a chhuah tawh chu, hna thawh zawh a la nih loh avangin May 5 thleng pawhsei a nih thu a tarlang.

Cod Nerc chuan nimin khan Thenzawlah ‘Climate change & its effect’ tih thupui zirhona an buatsaih a; ramngaw humhalh a ṭulzia te, thing phun kawngah khawtlang ṭanrual a pawimawhzia te, tuihna a pun theih nan ṭan lak nasat a ṭulziate an sawi. Cod Nerc leh Vitamin Angels thawhhona hmangin nu nau pai leh naupang kum ruk hnuai lam tan vitamin a thlawna sem a ni bawk.

C Zama ziah, 'Nun hlantu pasalṭhate' tih lehkhabu chu nimin khan Luangmuala Martar Thlanmualah ZoRO president R Sangkawia'n a tlangzarh. Lehkhabu hi phek 223-a chhah niin, Mizoramin zalenna a sual laia thi mi 18-te chanchin tarlan a ni a, Rs. 130 man a ni.