MBSE-in HSLC result tlakhniam chhan MISSTA Note tihtawp vangah an ngai

Mizoram Board of School Education (MBSE) chairman F Lianhmingthanga chuan, kumina HSLC Examination result a tlakhniam chhan ber chu - Mizoram Secondary School Teachers Association (MISSTA) Notebook sorkarin a tihtawp vang nia an ngaih thu a sawi.

HSLC 2019 result nimina tihchhuah a nih hnua thuthar thehdarhtute zawhna chhangin F Lianhmingthanga chuan, kum­ina HSLC result chu nikum aiin 9.72%-in a hniam zawk tih a sawi a, "District wise-a thlirin district tinah pass percentage a tlahniam vek a, Aizawl district-ah 1.7% vel chauhin a tlahniam a ni. Siaha district-ah result a tlahniam nasa ber a, 41.19%-in a tlahniam a, a dawttu Mamit district-ah 15.13%, a dawt leh Serchhip district-ah 13.81%-in a tlahniam a ni," a ti.

Kumina HSLC exam result tlakhniam chhan chu MBSE-in en chiangin an chhui thu sawiin MBSE Chairman chuan, "MISSTA Note hi thingtlang lamin an hmang nasa a, an ring hle. MISSTA Note tawp ta hi an tuar nasa niin a lang. Thingtlang lamah pass percentage a tlahniam nasa a ni," a ti.

MBSE Chairman sawi danin, Note-ah chuan subject tinah zawhna leh chhanna siam sa set paruk zel a awm a, Mizoramah an vawrhdarh nasa a ni. Note siam sa rin lutuk chu sorkarin ṭha loin a hria a, kum kal ta (2018) 

aṭang khan sorkarin a titawp a ni. MISSTA Note siam chu zirlai tam takin an lehkha zirnaah rin ber pakhatah an nei ṭhin.

F Lianhmingthanga chuan, headmaster nei lo high school an la tam hle tih sawiin, chu pawh chu result tlakhniam chhan nia an hriat thu a sawi a, "HSLC exam centre 113 kan nei a, chu'ng zinga centre 40-ah chuan regular headmaster (centre superintendet) kan nei lo. Hei hi result hniam chhan a ni ve thei ang," a ti.

MBSE Chairman chuan, a pum­puiah pass percentage tla­hniam mah se, quality lamah hma an sawna an hriat thu sawiin, "Distinction-ah mi 101-in nikum aiin kan pung a, topper (pakhatna)-ah pawh, nikuma pakhatnain 95.4% a hmuh laiin, kumina pakhatna chuan 97.2% a hmu. Top 10-ah kuminah mi 20 an lang a, nikumah mi 16 an lang a, top-10-a 10-nate mark hmuh zatah, kumina 10-nate'n 93.6% an hmu a, nikuma 10-nate mark hmuh aiin 2% velin a sang zawk a ni," a ti a; a quality lamah chuan kuminah an ṭhang nia an hriat thu leh chu chu an lawmna a nih thu a sawi.