MP inthlan kaihhnawiha complaint CEO-in a bawhzui dan a puangzar

Mizoram Lok Sabha inthlanpuia political party ṭhenkhatin Chief Electoral Officer (CEO) hnena complaint an thehluh chu CEO Ashish Kundra chuan a bawhzui dan thuchhuah siamin a puangzar. Heng complaint-te hi inthlan kaihhnawih dan Representation of the People Act bawhchhiatna a nih avangin, insawifiah tura tih an ni a, Vanglaini editor hrem tumna a awm lo a, independent candidate Lalnghinglova Hmar lakah thubuai siam a ni hek lo tih a tarlang. 

Vote thlak ní - April 11, 2019-a chhuak Vanglaini chanchinbuin candidate symbol dik lo a tihchhuah leh Lunglei district-a candidate serial number dah thlakthleng chungchangah CEO Office-in complaint a dawn thu a tarlang. Complaint chi hnihte chu CEO chuan bawhzui a nih dante a sawifiah a, "Ṭum danga inthlan ang bawkin Election department chuan thlei bik nei loin, fair takin hna a thawk a, heti chunga an hnathawhte rinhlelhawm anga ṭawngkam chhuak a awm zeuh hi a pawi hle a ni," a ti.

Mizoram CEO-in thuchhuah a siam dan - April 11, 2019-a Vanglaini ni tin chan­chinbuah candidate symbol dik lo tarlan a ni a, vote thlak ní a nih tawh avangin siamṭhatna hun a awm tawh lo a ni. Dan tehna aṭang chuan he thil thlenga mawhphurtu chu a editor leh publisher a ni a, hei vang hian Returning Officer-in editor lakah FIR a thehlut a ni. FIR-ah hian candidate hming pakhatmah a lang lo.

Amaherawhchu, Lalnghinglova Hmar hi joint editor leh candidate ni bawk a nih avang hian thu inchuh (confict of interest) a awm lo thei lo a, The Representation of the People Act, 1951 Section 123(4) bawhchhiatna a nih avangin ani leh chanchinbu editor hnenah show cause notice pek a ni. Hriat tur pawimawh tak chu, RP Act, 1951 leh criminal thubuai (criminal liability) hi thuhmun a ni lo.

Vanglaini chanchinbu editor hian show cause notice chhanna hi thehlutin, tihsual palh a nih thu a sawi tawh a, a mawhphurhna emaw hremna emaw tun dinhmunah pek tumna a awm lo. RO hian thlei bik nei loin, danin a tih angin hma a la a ni. Heti chung hian independent candidate Lalnghinglova Hmar election agent Lalhnehzauva chuan April 18 khan CEO office-ah complaint thehlut lehin, Lalnghinglova Hmar-in show cause notice a hmuh hmain social media-ah a copy vawrh darh a ni a tih bakah, a laka FIR thehlut angin a tarlang. Rang taka hmalak niin, CEO office chuan RO/DEO, Aizawl District leh ARO/DEO, Lunglei-te chu thil awmzia sawifiah turin a hriattir a ni.

April 11, 2019 vote thlak ní vêk khan Lunglei district-a polling station ṭhenkhatah contesting candidate-te tarlanna serial number leh hming Form-7A leh EVM ballot paper nen a inmil loh avangin K Hrangthantluanga, member, Coordination Committee, LDCC&ZPM Coordination Committee chuan complaint a thehlut. Lalhruaitluanga Kawlni, secretary, Joint MPCC &ZPM Campaign Committee pawhin thehlutin, complaint hi hmuh a nih rualin Lunglei district Election officer chu enquiry la tur leh poster dik lo târ chhuahte thlak nghal turin CEO office chuan a hriattir.

Hemi ní vêk hian Lunglei DEO chuan chhan­na rawn thehlutin, complaint thehluttu K Hrangthantluanga pawh hian LDCC&ZPM Coor­dination Committee, Lunglei district hruaitute hriat­puinain ngun taka an ngaihtuah hnuah, an com­plaint hi an hnuhkîr thu ziakin a thlen a ni. 

Lunglei DEO chuan poster dik lote hi vote thlak ni hma khan an hriat chhuah thu a sawi a, hei vang hian Sector Officer kaltlangin Lunglei khaw chhung leh a chhehvela an lo târ tawhte pawh a zan la lain lak thlaktir leh an nih thu a tarlang. Thorang Constituency bika polling station pahnih Dengsur leh Rangte te kha biakpawh an harsat avangin April 10 zanah an la thla hman lo a, vote thlak ni April 11 khan an lak thlak hman thu a sawi bawk.

April 18, 2019-a Lal­hnehzauva, Lalnghinglova Hmar election agent complaint thehluhah khan he thil hi tarlan nawn leh a ni a. A complaint thehluhah hian RO leh ARO, Lung­lei district-te hming a lan avangin an hnenah thil awm­zia sawifiah tura tih an ni. RO chuan ziaka complaint a hnen a thlen loh avang­in atan action lak theih a nih loh thu a tarlang.

ARO, Lunglei district pawhin hma an laknate leh Thorang constituency bika Dengsur leh Rengteahte pawh vote thlak ṭan hmain poster dik lote la thlain, Form-7A photocopy-a thlak thleng a nih thu a sawi. Hemi chung­chang hi ziakin Lalhruai­tluanga Kawlni, secretary, Joint  MPCC&ZPM Campaign Committee hnenah hriattir a ni tawh.

April 29 khan James Thanghmingmawia, MPCC Legal secretary chuan Lunglei Police Station-ah RO leh ARO-te lakah FIR a thehlut tih hriat a ni a. May 1 khan FIR chungchang hi Lung­lei Chief Judicial Magistrate Court-ah ngaihtuah a ni. FIR hi CJM, Lung­lei District Court chuan a zir chian hnuah, RP Act, 1951 Section 80-in a tarlan angin, inthlan chungchang a ni a, FIR thehluh chu election petition hmanga ngaih­tuah chi a ni a, a ngaihtuah theitu chu High Court a ni tiin, a pawmsak ta lo a ni.