Sorkar sikulte'n ṭan an lâk a ngai - School Education Minister

Chaltlang High School chuan nimin khan an sikulah HSLC Examination 2019-a an zirlai tiṭhate chawimawina an buatsaih a; khuallian Lalchhandama Ralte, School Education minister chuan, sorkar sikulte'n ṭan an lâk a ngaih thu a sawi.

School Education Minister chuan, sorkarin sikul tam tak a neih thu sawiin, "HSLC 2019 result-ah sorkar sikul aṭangin top 10-a lang an awm lo hian ṭan lâk a ngaihzia a tilang. Zirtirtute leh zirlaite'n ṭan an lak a ṭul a, kum 2020 HSLC result a chhuah hunah chuan top 10-ah sorkar sikul lang ve ngei tawh se ka duh a ni," a ti.

Lalchhandama Ralte chuan, HSLC 2019 result-ah a pumpuiah kum hmasa phak lohna awm mahse thil lawmawm tak a lang tih sawiin, "A ti ṭha top 10-ah hming 20 a lang a, chungte chu Mizo chhûl chhuak vek an ni," a ti a; division sang lamah pawh hmasawnna hmuh tur a awm thu a sawi.

Chaltlang High School hian HSLC 2019-ah candidate 90 an nei a, 84 an pass a ni.