Bru hruai kîr hna thawk leh turin MHA-in Mizoram sorkar a hriattir

Ministry of Home Affairs (MHA) chuan Mizoram sorkar chu Tripura relief camp-a Bru hruai kîr hna kalpui leh turin a hriattir. Mizoram sorkar erawh chuan fûr a zawh hma chuan hruai kîr hna thawh theih a nih loh thuin a chháng.

Vanglaini palai zawhna chhangin Home department additional secretary Lalbiak­zama chuan, Bru hruai kîr hna thawk tur leh inbuatsaih turin MHA chuan Mizoram sorkar chu Lok Sabha inthlanpui vote thlak zawh hnu lawkah a rawn hriattir a ni. Mahse, vote thlak zawh hnuah pawh Model Code of Conduct hman a la nih thu leh, fûr lai chuan hruai kir hna thawh theih a nih dawn loh avangin fûr zawh a ngaih thu, Home department chuan MHA-ah a thlen a ni.

Lalbiakzama chuan, fûr laiin leimin leh thil dang hrang hrang vangin Bru-te lak lêt hna kalpui chi a nih loh thu a sawi a, "Hruai kîr hna thawk tur chuan fûr a zawh hun kan nghah a ngai dawn a ni," a ti.