Jampui leh Churachandpur-ah MST bus Tlântir turin hmalak mek a ni - Transport Minister

Transport minister TJ Lalnuntluanga chuan nimin khan Mizo Hnam Runa inkhawmah thu sawiin, Jampui tlangdungah leh Churachandpur-ah MST bus tlantir turin hmalak mek a nih thu a sawi.

Transport Minister chuan, Transport depart­ment-in MST bus 35 a neih zinga 25 an tlan thei tih sawiin, "Commercial vehicle-te hi mipui tan chuan man a to êm avangin hlâwkna ûm nan ni lo, bus service tihtam kan tum. Zo fate inpumkhatna hi MNF-in kan tum ber a nih angin, Jampui leh Churachandpur thlenga bus service tur kan tifel ṭêp a, Burma lam chu sorkar laipui nena indawr ngai a nih avangin indawrna a kal mek," a ti.

Inland water transport pawh an tuipui tih sawiin TJ Lalnuntluanga chuan, "Akyab leh Bangladesh lam thlengin hmalakna kan kalpui mek a, lawng hmangin bungraw chi hrang hrang Kolkata lam kan dâwr theih chuan, ho tê têah Vairengte leh Bairabi velah vaiho nena innâwk buai fo pawh a bo tawh ang," a ti a; motor registration leh road tax chu online system-a kalpui tum a nih thu a sawi.

TJ Lalnuntluanga chuan, MNF-in malsawmna an dawng nasa a, sorkar pawhin kawng hrang hrangin hma a sawn zel tih sawiin, MNF sorkar hnathawh tawhah mipui an lâwm tlanga a hriat thu a sawi a, "MNF hian development ringawt te, mahni pumpui ṭánghma hai ringawt leh sorkar kan nih anga lo intih lal ringawt ang hi kan tih ve tur a ni lo. Hnam movement kengtu kan ni a, Zoram leh hnam dinchhuahna tur hi kan rilruah a lian ber tur a ni," a ti.

A department chan dang EFCC department chungchangah TJ Lalnuntluanga chuan, "Khaw lum chakzia kan hria. CM-in a ngaih pawi­mawh Urban Planta­tion leh Rural Plantation Project kalpui mek a ni a, tun hma anga ṭul loa sum hman ral ang kha tihbo vek kan tum," a ti.