Mahni tha thawh miah lohna hming thlak hi Thil tenawm tak a ni - Lal Thanhawla

Mizoram Pradesh Congress Committee (MPCC) president Lal Thanhawla chuan nimin khan Congress Bhavan-a political session-ah thu sawiin, Mizoram Institute of Medical Education and Research (MIMER)-ah MNF-te'n tha an thawh ve loh thu leh, thâ thawh miah lohna hming thlak chu thil tenawm tak a nih thu a sawi.

Lal Thanhawla chuan, MNF sorkara Cabinet meeting-ah MIMER hming thlak an rel thluk chungchang sawiin, "Anmahni kutkawih pawh tel si lo a, mi dangte'n theihtawp chhuah leh hah taka an sual chhuah sa, a hming lam a awl zawk tih mai mai vanga a hming an thlak hi thil tenawm tak a ni a, mipui min zahlo hle," a ti.

MPCC President chuan, "MIMER hi thil dang zirna atan pawha hman theih turin leh nakin zel atana medical college aia ṭha zawk a nih theih nan kan hotute'n ngun taka a hming an phuah a ni. Zorama Medical College tih hian ram ropui tak min thlenpui lo ang," a ti a, tuna New Capital Complex hmunah hian New Capital a leng lo a, New Secretariat erawh a len thu a sawi.

MNF-te chuan kum 20 chhung ramhnuai aṭangin Mizoram an tichhe tawh nia sawiin Hawla chuan, "Hmasawn hlei thei loa kan awm leh mipui nunau an zalen lo hi ṭha kan ti lo a, zahawm taka an rawn haw dan kawng kan zawng a, sa lû an rawn hâwn lo a nih pawhin an rawn hawn ang ang kawtchhuahah ropui taka lo hmuakin kan lo lawm ang, kan ti a. Ramri chungchang tal sawi fel ang u kan ti a, an rawn haw hun a tihkhawtlai dawn avangin an tawlh hun hun a, an ngai pawimawh lo a ni," a ti.

Lal Thanhawla chuan, MNF-te'n kum 20 chhung ramhnuai aṭangin ram an tihchhiat duhtâwk loin, a chhung aṭangin ram an sawp chhe zui nia sawiin, "An sorkar chhungin hmasawnna lian tham hmuh tur a awm lo. Hmasawnna zîktluak, chhuan lo kal zel turte tana chhawr ṭangkai tur kutchhuak an nei zui em?" a ti. 

Lal Thanhawla chuan, Tuirial Hydep Project (HEP) atan Congress sorkarin a lung an phûm hnuah MNF sorkar a ding a, MNF sorkar hotupa leh a chhungkhatte'n zangnadawmna uchuak taka an lak avangin Tuirial HEP chu tihchhiat vek a nih thu a sawi a, "Kan sorkar leh hnuin kan tipuitling a, Prime Minister-in hawn a rawn chuh a nih kha," a ti a, Mizoram rohlu ni tura hmasawnna hna zawng zawng chu Congress kut chhuak anih thu a sawi.