KHAWTHLIR

Chief minister Zoramthanga chuan May 2, Ningani khan Chalfilh Tourist Resort a tlawh a, chei ṭhat dan tur leh a panna kawng siam ṭhat dan tur a enfiah. Chief Minister hi Assembly speaker Lalrinliana Sailo leh minister pathum - 

R Lalzirliana, Lalchhandama Ralte leh Robert Romawia Royte ten an ṭawiawm a ni.

MPSC-in Combined Competitive Examination 2018 a buatsaihah Mizoram Finance & Account Service (MFAS) Junior Grade atan Alvina Ramdinthari d/o Van­lalrema, Mission Veng; Kevin Lalmalsawma s/o J Zothanpuia, Tuikhuahtlang leh Vanlalrosiama s/o Rohmingliana Ralte, Salem Veng, Aizawl-te an tling. Kum khat chhung dam tur panel list-ah mi pahnih an awm bawk.

Association for Environmental Protection-in nungcha, thing leh mau humhalhna kawnga mipuite zirtirna tura hmalakna chi khat ‘Nature & Environment Photography Competition’ a buatsaiha ti ṭhate hnenah nimin khan IPR auditorium-ah IPR director David L Thangliana'n lawmman a sem. Lawmman dawngtute chu pakhatna Lalvohbika Hrahsel, West Phaileng, pahnihna chu C Lalbiakzama, Pàwlráng leh pathumna C Lalsiammawia, Lunglei te an ni.

MADC sorkara Local Administration department chuan nimin zing khan Siaha Bazar traffic point-ah Clean Siaha Drive hawnna inkhawm an buatsaih. Khuallian K Siakhai, adviser to CEM chuan, Siaha khawpui faina turin MADC leh NGO-te'n hma la ṭhin mah se, zawm a hlawh lo tih sawiin, "Kan taksa leh kan thawmhnawte hi fai hle mah se, kan in leh a chhehvel a fai si lo chuan faina tluantling a ni lo," a ti.

MNF ṭhalaite chuan thuchhuah siamin, High School Leaving Certificate (HSLC) 2019 result tihchhuah a ni chu lawmawm an tih thu an tarlang a, "Hlawhtlinna changte kan lawmpui rualin, hlawhtlinna chang zo ta lote kan tawrhpui a, beidawng loa theihtawp chhuah zel turin kan duh hle. Nikum aia kumin HSLC pass percentage tlahniam chu pawi kan ti a, result ṭha nei tura zirlai zawng zawngte ṭang la lehzual turin duhsakna kan hlan a ni," an ti.