Aviation Principal Consultant chhui turin Mizoram Lokayukta-in ACB a hriattir

GAD Aviation Wing-a principal consultant J Lalhmingliana'n Aviation Wing sum tam tham tak a mimal bank account-ah a dah nia puh chungchang chu Mizoram Lokayukta chuan chhui zui tlakah a ngai a, Anti-Corruption Bureau (ACB) chu preliminary inquiry ti turin a hriattir.

Mizoram Pradesh Youth Congress Committee (MPYCC) chuan J Lal­hmingliana chu dan dik loa sum enkawlah an puh a, chuvang chuan a hna aṭanga bàn tura ngenna chief minister Zoramthanga hnenah April 26, 2019-a an thehlut a, April 26 vek hian Mizoram Lokayukta-ah complaint an thehlut a ni.

MPYCC-in complaint an thehluh chu Mizoram Lokayukta chuan chhui zui tlakah ngaiin, Mizoram Loka­yukta Act, 2014 Section 19 tlawhchhanin preliminary inquiry/investigation tih zui turin thutlukna a siam a; Mizoram Lokayukta Act, 2014 Section 19(1) tlawhchhanin ACB chu a rang thei ang bera preliminary inquiry ti tur leh Lokayukta-ah report thehlut thuai turin a hriattir a ni. 

Hemi chungchangah hian Mizoram Lokayukta chairman C Lalsawta'n nimin khan order a chhuah. Complaint thehluttu MPYCC tarlan danin, helicopter hman (hire) man Rs. 16,72,720 leh consultancy firm pakhat sum Rs. 39,70,000, a belhkhawma Rs. 56,42,720 chu April 9, 2019-ah J Lalhmingliana'n a dawng a, April 10-ah consultancy firm aṭangin Rs. 45,35,300 a la leh bawk. Sum a lâkte chu a mimal bank account - ICICI Bank account no. 240701500605-ah a dah lut a ni.

C Ngunlianchunga, MLA helicopter hman (charter) man Rs. 1,20,000 pawh Aviation Wing-a lut tura tih a nih laiin, Ngunlianchunga'n blank cheque-a a pek chu J Lalhmingliana'n a mimal cheque-ah ziak chawpin a mimal bank account-ah a dah lut a ni.

Congress ṭhalai thuchuah tarlan danin, C Ngunlianchunga helicopter hman man Rs. 1,20,000 chu helicopter neitu Pawan Hans hnena pek tur a ni a; consultancy firm sum tur chu hnathawh an zawh chiah loh pawhin Aviation Wing-in an kawl ang a, hna an zawh huna pek tur a ni.