Excise leh MRHG training zote tan Passing out parade buatsaih a ni

Mizoram Excise & Narcotics constable batch pakuana leh Mizoram Home Guards & Civil Defence volunteer batch 39-na, Central Training Institute (CTI), Sesawnga training zote pualin nimin khan CTI, Sesawngah passing out parade neih a ni a, Home minister Lalchamliana leh Excise & Narcotics minister Dr K Beichhua ten an hmanpui.

Home Minister chuan, Excise & Narcotics department-a thawkte chu mipui rawngbawltu, a bikin zu leh ruihhlo laka venghimtu an nih thu sawiin, "NDPS Act, 1985 leh MLP Act, 2019-te kengkawh tura khaipa an ni," a ti a; training chhuakte chu ram leh hnam hmangaihna rilru dik tak pu chunga thawk turin a fuih. 

MRHGCD volunteer-te pawh venhim hna pawimawh tak thawktute an nih thu sawiin Lalchamliana chuan, "Sorkar hmun pawimawh hrang hrang vengtu an ni a, heng bakah rîkrum thil hrang hranga ṭangkai taka hna lo thawk ṭhintute an nih avangin an chhuanawm hle. Mahni inphata mi dangte tana rawngbawl tih nunpuitute an ni a, ram leh hnam venghimtu tur leh nunna chhanhim turin mawhphurhna lian tak an nei a ni," a ti.

Excise & Narcotics minister K Bei­chhua pawhin thu sawiin, "Mahni hna rinawm leh taima taka thawktute chu mi ngaihsanawm an ni a, dam chhung tawi tê hman ṭhat a pawimawh," a ti a, training chhuakte chu ram leh hnam tana malsawmna ni turin a fuih.

CTI, Sesawnga basic training zote hi October 29, 2018-ah an training ṭan a, nimin khan an training zo. Mizoram Home Guards & Civil Defence-a basic training passing out parade neite chu batch 38-nate an ni a, mipa 36 leh hmeichhia pathum an ni. Excise & Narcotics-ah chuan constable leh wireless operator 52 an training chhuak a, mipa 40 leh hmeichhia 12 an ni.