Mumbai Indians tan playoff a chiang
Indian Premier League playoff-ah Mumbai Indians an inkhel dawn chiang ta - Mumbai club hian Ningani zan khan super over-ah Sunrisers Hyderabad an hneh a, palina aia hniamah an awm thei tawh lo.
Mumbai Indians hian over 20-ah run 162 siamin wicket nga an hloh a, Quinton de Kock chuan run 69 ngawt siamin a tawp thleng a dam. Mahse, MI batsman dang zingah run 30 vaw kai thei an awm lo a, wicket an hloh tlem ngaihtuahin run an siam hnem tawk lo.
Sunrisers Hyderabad bat hun a thleng a, Manish Pandey chuan batsman satliah a nih lohzia pholangin run 71 ngawt a rawn vaw chhuak a, an team tan a tawp thleng a ding. Kum 29 mi batsman hian a team hi hnehna chanpui zo lo mah se a che ropui hle - over tawp berah chak turin run 17 an mamawh a, ball tawp berah run sarih an mamawh. Pandey hian Hardik Pandya ball hnuhnung berah six run a vaw chhuak a, wicket ruk hlohin an target 162 an phak chiah chiah!
Pandey chet ṭhat zarah Hyderabad-in Super Over-ah Mumbai Indians an hruai thleng - Mahse SRH hian run riat bak an tlin tawh lo a, MI mamawh zat chu run kua a ni. Mumbai club tan Hardik Pandya chuan ball hmasa berah six run a rawn vaw chhuak nghal a, ball hnihnaah run khat a vaw chhuak leh bawk - ball thumna an vawm dawnin run hnih bak an mamawh tawh lo.
Kieron Pollard chuan an mamawh zat run hnih hi a rawn vaw chhuak a, Mumbai Indians an chak a, playoff hmun a chiang nghal. Mumbai Indians hian match khat chiah khelh tur nei tawh chungin playoff hmun hi an tichiang a, Pathianni zana Kolkata Knight Riders nen an inkhelh hunah hnehna an chan chuan a sang pahnih zingah an tel chiang ang.
SRH-in match 12-ah point 12 an nei tawh a, playoff khelh beiseina a la bo bik lo. Hyderabad club hian zanin dar 8:00-ah beisei tur nei tawh lo Royal Challengers Bangalore an lenchilh ang a, hnehna an chan chuan playoff khel turin an tling ang.
Inkhel Result
Mumbai Indians bt Sunrisers Hyderabad
*Super Over-ah Mumbai Indians an chak
MI - 162/5 (20) SRH - 162/6 (20)
Quinton de Kock - 69 (58) Manish Pandey - 71* (47)
Rohit Sharma - 24 (25) Mohammad Nabi - 31 (20)
Khaleel Ahmed - 42/3 (4) Hardik Pandya - 20/2 (2)
Mohammad Nabi - 24/1 (4) Krunal Pandya - 22/2 (4)
Vawiin Inkhel Tur
Delhi Capitals 4:00 PM Rajasthan Royals
Royal Challengers Bangalore 8:00 PM Sunrisers Hyderabad
May 5, Pathianni
Kings XI Punjab 4:00 PM Chennai Super Kings
Mumbai Indians 8:00 PM Kolkata Knight Riders