Mizo ṭawng vawn him theihna atan Language Development Board din

Lalchhandama Ralte chuan, SEDP hnuaia din Human Resources Development Board chuan Chief Minister thu angin Mizo ṭawng humhalh chungchangah hma an lâk thu a sawi a, "Mizo ṭawng vawng him turin Mizoram Language Development Board din a ni a, draft bill peih a ni tawh. Thlasik session-ah chuan put luh hman kan tum," a ti.

MNF member Lalrintluanga Sailo chuan, Chakma area-ah Mizo ṭawng zirtir a ngai tih sawiin, "Kan zingah kumkhuaa awm tur an nih avangin special deuha zirtir dan a awm thei em? Grassroot level-ah tun ang lo deuha kalpui dan a awm thei em?" a ti a; Chakma-te'n Mizo ṭawng an thiam loh avangin an phâk tâwk hna an dilnaah an tlin theih loh thu a sawi.

Hemi chungchangah hian Education Minister chuan, ngaihtuahna uluk taka hman a ngaih thu  a sawi a, "Sum leh pai dinhmunte ngaihtuah tel a ngai," a ti.

Lalchhandama Ralte chuan, MYC bultumin Delhi-a IAS coaching centre-a lut turin Mizo ṭhalai 20 thlan an nih thu sawiin, "An vaiin coaching centre an zawm vek tawh. MYC-in zirlai pakhat tan cheng nuai 3 vel ṭheuh a séng," a ti a; ALS Coaching Academy leh Chanakya IAS Coaching Center-ah 10 ve ve an awm thu a sawi.

Chief Minister hoin dinhmun sang zawka sikul hláng kai tura ngaihtuahna an sèn laiin Covid-19 avangin beisei leh an duh kawng an zawh thei lo tih sawiin Minister chuan, "Hripuite a ziaawm a, sum leh pai dinhmunin a ṭhat chhoh chuan a tahtawlin tih theih a beiseiawm," a ti.

School Education Minister sawi danin, an department chuan SEDP hnuaiah high school zirtirtu indaih lohna hnawh khahna atan thla 10 atan zirtirtu 157 chhawr theihna an dawng a, hmalak mek a ni.

Sorkar sikulah zirlai tam zawk an luh theihna atan theihtawp an chhuah tih sawiin Lalchhandama Ralte chuan, "Hemi atan hian kawng hrang hrangin zirtirtute pawh ṭang turin kan ti a, chhunglamah kan infuihthar. MNF sorkar hnua zirtirtu 800 chuang kan lak hnuah phei chuan private aiin sorkar sikulah zirlai punna a nasa," a ti.