KHAWTHLIR

Nimin Assembly session-ah MNF member H Biakzauva resolution, 'Covid-19 hripui léng do kawnga sorkar, kohhran, tlawmngai pawl leh Zoram mipuite ṭan rualna avanga India rama ti ṭha ber state zinga Mizoram kan tel hi a lawmawm kan ti a, he hripui dona kawngah nasa lehzuala ṭanho chhunzawm zel kan ti,' tih chu sawiho a nih hnuah pawm a ni.

Nimin khan Pachhunga University College NSS unit chuan an college-ah thisen pek rûnpui an huaihawt a, Civil Hospital, Aizawl tan mipa 124 leh hmeichhia 50-in thisen unit 174 an pe. Lungleia JB College NSS-in an college-ah Civil Hospital, Lunglei tan thisen unit 15 an pe a, a petute hmeichhia pakua leh mipa paruk an ni. TKP, Thenzawl Bial pawhin Serchhip Hospital tan unit 31 an pe a, petute mipa 20 leh hmeichhia 11 an ni.

General Administration department (GAD) chuan March 11, Ningani khan office memorandum SDMA hnuaia SEC thutlukna angin, Covid-19 hripui laka invênna atan official function leh mipui punkhawmna programme reng rengah zai (solo tiamin) phal a nih loh thu a tarlang.

Nimin khan Saikuti Hall, Lungleiah chhiatrupna thlena khawtlang hruaitute inbuatsaih dan tur leh hmalak dan tur zirhona buatsaih a ni a, Lunglei district-a VC 113 aṭangin khawtlang hruaitute an tel. Lunglei SDC Collin Hlychho leh DMR district organiser Chaupari Pachuau ten thil pawimawh an zirtir a ni.

Nimina Vanglaini chhuaka FCSCA minister K Lalrinliana'n buhfai pek chungchang a sawia 'door to door delivery' tia tarlan chu 'doorstep delivery' tih tur zawk a ni. Doorstep delivery tih hi Supply kudam aṭanga retailer-te hnena pek chungchang sawina a ni.

Kolasib DC Dr H Lalthlangliana chuan March 11 khan Bilkhawthlir North Village Organisation hnenah ICAR, Mizoram Centre hmalakna hnuaia Tribal Sub Plan kaltlanga lei artui tihkeuna hatchery unit pahnih a hlân.