MP leh MLA-te tan workshop buatsaih 2020-ah TB vei mi 2,282 hmu chhuak

National TB Elimination Programme chuan nimin khan Assembly conference hall-ah MLA leh MP-te orientation workshop an neihpui a; Mizoramah kum tin ngawr (Tuberculosis) vei mi 3,000 vel hmuh chhuah a nih ṭhin thu leh kum 2020 chhungin mi 2,282 hmuh chhuah a nih thu tarlan a ni.

Workshop kaihruaitu Health secretary R Lalramnghaka chuan, Mizoramah kum tin TB vei mi 3,000 vel hmuh chhuah ṭhin a nih thu leh TB vanga thi mi 50 vel an awm ṭhin thu a sawi a; Mizoramah HIV vei an pun nasat avang leh TB leh HIV chu natna kal kawp a nih avangin TB vei an tam phah thu sawiin, India-in kum 2025-ah TB do rêm a tum avangin MP leh MLA-te chu ṭhahnemngai taka hmalakpui turin a ngen.

State TB officer Dr Zothankhuma Chhakchhuak-in TB chungchanga thil pawimawhte a sawi a; Health minister Dr R Lalthangliana'n thu a sawi bawk.

Workshop-a tarlan danin, kum 2020 chhungin Mizoram pumah TB vei mi 2,296 hmuh chhuah a ni a, TB tihdam harsa bik MDR-TB vei mi 149 hmuh chhuah a nih bakah, TB leh HIV vei kawp mi 287 hmuh chhuah a ni. Nikum khan TB vangin mi 49 an thi a, TB vei enkawl dam zat chu 78% a ni.