Nazuk Kumar-in ṭha takin a hna ngai thawk se - Mizoram IAS Assn

Mizoram IAS Association (MIA) chuan thuchhuah siamin, Higher & Technical Education director atana a dah thar Nazuk Kumar chuan sorkarin a dah ang takin boruak rálmuang tak hnuaiah a hna ṭha takin thawk se an duh thu an tarlang.

MIA chuan, zirlai pawlte'n HTE director atana hnam dang an duh loh chhan an tarlan chu awmze nei loa an ngaih thu tarlangin, technical course zir tur thlan dan chu HTE Director-in ama duh thua a tihdanglam theih emaw, a duh duha a tih theih a nih loh thu an sawi a, "Sorkarin dan ṭha tak a nei a, dan anga kal a nih phawt chuan buaina a awm lo ang," an ti.

Nazuk Kumar chung­changa zirlai pawl chet dan chu mi hnathawk tur tihbuaina te, thawhna hmun aṭanga innawr chhuahna anga ngaih theih a nih thu te, hnam dang hmuha Mizo hmel tibaltu leh timualphotu a nih theih thute an tarlang bawk a, "Rorelna dik leh mipui tana ṭha tur ngaihtuahin, sorkarin a dah anga Nazuk Kumar hi boruak rálmuang tak hnuaiah a hna thar ṭha taka thawhtir ni se kan duh a ni," an ti.