Biak-ina zai phal loh Chief Minister-in sawifiah

Chief minister Zoramthanga chuan  biak-ina inkhawma zai phal a nih loh chhan nimin khan Assembly session-ah a sawifiah a, zai phalna pek a nih hmain media lamah zai phal tawh angin a lo darh tih a sawi.

Chief minister chuan, "Zai phal leh phal loh kha a hun hmaa lo aupui an awm," a ti a, committee-a zai duh tawhte'n rawtna an siam chu thuneitu sangin an pawm (approve) hma chu kalphung tur (SOP) a la ni thei lo tiin a sawi a, "Thutlukna pawh a awm hmain media lamah 'an phal e' tiin an lo tichhuak mai a, record-ah pawh a awm miah lo," a ti a, boruak ṭhat deuhah ṭha taka inkhawm leh theih a beisei thu a sawi.

Hetihlai hian March 9, 2021-a sorkar thuchhuah chuan, "Vawiin khan Health Minister Dr. R. Lalthangliana hovin SAD Conference Hall, MINECO-ah Mizorama COVID-19 hri leng dinhmun thlirhona neih a ni a. Meetingah hian Home Minister Pu Lalchamliana, Medical Operational Team Chairman Dr. ZR Thiamsanga, MLA bakah Sawrkar department hrang hrang hotute an tel a, Mizoram University, Mizoram kohhran Hruaitute Committee, Jt. NGO Coordination Committee, Indian Medical Association leh Mizo Zirlai Pawl aiawhte an tel bawk.

"Vawiin meeting chuan Mizoram COVID-19 dinhmun uluk taka an sawiho hnuah boruakin ziaawm lam a pan zel nia a lan avangin kar khatah zan hnih Pathian biak inkhawm neih tawh ni se an ti a, biak ina Pathian faka zaiho pawh phal tawh nise an ti. Hemi atan hian State Executive Committee on State Disaster Management in Standard Operating Procedure siamin order an tichhuak ang," tiin an ziak thung a ni.

Congress Legislature Party leader Zodintluanga chuan, Health Minister hoa rel tawh biak-ina zai phal a hnu lawka an phal lo leh chu rorelna mak tak a nih thu a sawi a, Health Minister chak tak hmingṭha tur dodalnaah Covid-19 chu an hmang nia a hriat thu niminah House-ah a sawi lang.