Sorkar sum dinhmun a ṭha lo hle - MPCC Vice President

Mizoram Pradesh Congress Committee (MPCC) vice president leh Finance minister hlui Lalsawta chuan, Mizoram sorkar sum dinhmun a ṭha lo a, mipui mimir bakah, sorkar hnathawkte leh pensioner-te an khawngaihthlak hle tih a sawi.

Nimina Congress Bhavan-a inkhawmah thu sawiin Lalsawta chuan, "Tunah hian Mizoram sorkar sum dinhmun a ṭha tâwk lo hle a, mipui mimir mai ni lo, sorkar hnathawkte leh pensioner-te an khawngaihthlak hle. Congress sorkar khan sum leh pai enkawl chungchangah kalphung nghet leh fel tak a nei a, ram tana thil ṭha turah chuan nghet takin kan kal ṭhin," a ti.

Lalsawta chuan, Congress sorkarin Mizoram sum dinhmun nasa takin an siamṭha tih sawiin, "Congress sorkarah khan pawisa tamzia kan sawi ngai lo a, mi dang pawhin an sawi ngai lo. Ram sum dinhmun erawh kan siam ṭha hle. Chhungkaw pa berin sum tamzia an sawi an sawi hi a zahawm lo a ni," a ti a, sum tamzia sawi fo chu fate (mipui) hruai sualna a nih thu a sawi.

MPCC Vice President chuan, Congress party hmingin Mizoram mipui hnenah ngaihdam a dil a, "Kan tih tur kan tih loh leh kan tih loh tur eng emaw zat kan tih avangin Congress party hmingin Mizoram mipui hnenah ngaihdam ka dil a ni," a ti.

Congress party-in kalphung tharin hma an la dawn tih sawiin Lalsawta chuan, "Mizorama mi ṭha ber ber fuan khawmna Congress party hi Mizoram mipuiin min nghâk. Mi ṭha báwm siam kan tum lo, mahse, mi ṭha lote pawh an ṭhat theihna báwm Pathian zarah siam kan tum," a ti a; chutiang chu ram mipui hmasawn nan a ṭul thu a sawi.

Lalsawta chuan, hun laklawhah party office bearer hmun ruak a awmin, OB dangte'n hmun ruak an luah ṭhin laia amah ring tâwka Vice President atana ruat a ni chu Congress party ropui leh nghehzia tichiangtu a nih thu a sawi bawk.

MPCC Vice President thar chungchangah MPCC president Lal Thanhawla chuan, "Congress party-in vice president mi hmingṭha tak kan nei leh ta hi Congress party mai ni lo, Mizoram mipui tan a lawmawm hle a ni. Vice president ṭha tak kan neih theihna tura MPCC treasurer leh CLP leader Pu Zodintluanga rawtna hi ram leh hnam rawngbawl tura inpe tan entawn tlak a ni," a ti.