COVID-19: Mizoram dinhmun Hripui vei mi 1 hmuh belh a ni

March 11, Ningani khan Mizoramah Covid-19 vei mi pakhat hmuh chhuah a ni a, nimin khan hripui laka fihlim chhuahtir an awm lo.

Covid-19 vei hmuh thar chu Champhai Vengthlanga mipa kum 13 mi, TrueNAT-PCR hmanga sample pathum endik zinga mi a ni a; tualchhunga kái, a kaina hriata ngaih niin, natna lang chhuak lo a ni. Swab sample ZMC laboratory-a endik 10 leh RAT hmanga district pasariha sample 503 endik zingah hripui vei an awm lo.

Mizoramah Covid-19 vei mi 4,435 hmuh chhuah a ni tawh a, mipa 3,235 leh hmeichhia 1,200 an ni. Nimin tlai dar 5 thleng khan mi 4,416 (99.57%) chhuahtir an ni tawh a, mi 10 (0.23%) thi tawhin, enkawl mek mi pakua (0.20%) an awm.

March 11, 2021 thlenga Mizorama swab sample endik tawh zat chu 2,40,960 a ni a, chu'ng aṭanga Covid-19 positive hmuh tawh zat 4,435 chu 1.84% a ni. Hripui vei hmuh tawh zinga mi 2,118 chu Mizoram chhunga kái chhâwng an ni a, mi 2,317 chu Mizoram páwn aṭanga an rawn luh hnua hmuh chhuah an ni thung.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,657 hmuh chhuah a ni tawh a, TrueNAT-PCR hmangin 674 leh RAT hmangin 1,103 hmuh chhuah a ni tawh.

Tun dinhmunah Mizorama district 11 zinga pariat - Lunglei, Siaha, Kolasib, Serchhip, Lawngtlai, Mamit, Khawzawl leh Hnahthial district-ahte Covid-19 vei an awm tawh rih lo. Aizawl, Champhai leh Saitual district-ah chiah hripui vei enkawl an awm tawh a ni.