Covid vaccine dose 1,28,840 dawng tawh

Covid-19 laka invenna damdawi (vaccine) pek chungchang ngaihtuahtu State Task Force for Covid-19 Vaccination chu March 11, Ningani khan Secretariat conference hall-ah chairman R Lalramnghaka, Health secretary hoin an ṭhu khawm. Mizoramin Covid-19 vaccine Covishield dose 1,28,840 a dawn tawh thu an tarlang.

Ṭhutkhawma tarlan danin, Mizoramin January-ah Covishield 35,000, February-ah 75,400 leh March-ah 18,440 a dawng tawh a; January leh February thlaah vawi hnih ve ve dawngin, March thlaah vawi khat a dawng tawh. Damdawi dawn tawh zinga dose 5,110 chu sorkar laipui hnuaia thawkte tan ruahman a ni.

COWIN 1.0-ah database-a hming chuangte tan chauh vaccine dawn theih a ni a, March 1, 2021 aṭanga hman ṭan COWIN 2.0-ah erawh chuan healthcare worker, frontline worker, kum 60 chung lam leh kum 45-59 inkar natna benvawn nei (natna chi hrang 20)-te tan Aadhaar card kengin vaccine pekna hmunah inziak luta hri danna lâk theih a ni.

March 10, 2021 thleng khan Mizoramah healthcare worker 11,753 (75%)-in vaccine first dose an la tawh a, an zinga 9,797 chuan second dose an la tawh. Frontline worker zinga 18,534 (67%)-in first dose la tawhin, an zinga pahnihin second dose an la tawh a; kum 60 chung lam mi 10,199 leh kum 45-59 inkar natna benvawn nei mi 825-in first dose an la tawh. Kum 2011 chhiarpui anga chhûtin, kum 60 chung lam vaccine la zat hi 12.78% an ni.

Meeting chuan, Covid vaccine first dose la tawhte tan an lâkna hmun ngaiah kher second dose lak a ngai lo a, Mizoram chhung leh páwna vaccine centre khawiah pawh second dose lak theih a nih thu an tarlang.