Pesticides hman a nih avangin Harsatna lian tham a la awm lo

Agriculture minister C Lalrinsanga chuan MNF member Dr Vanlalṭanpuia zawhna chhangin, loneitute'n pesticides an hman avangin harsatna lian tham a la awm loh thu a sawi.

C Lalrinsanga chuan, Mizoram chu organic state a nih loh thu sawiin, "Mizorama loneitute'n fertilizer an hman tlángláwn berte chu urea (nitrigenous fertilizer) te, MOP (potasic fertilizer) leh DAP (phosphatic fertilizer)-te an ni. Mizorama fertilizer kan châwk luhte hi district hrang hranga a thlenna hmuna tihthlen a nih hnuin fertilizer inspector-te'n sample an la a, chu chu Fertilizer Testing Laboratory, Aizawlah endik ṭhin a ni," a ti.

Loneitute'n pesticides an hman avanga harsatna lian tham a la awm loh avangin zir chianna neih a nih loh thu sawiin Minister chuan, "Amaherawhchu, loneitute hi pesticides hman tur leh hman dan dikte zirtir ṭhin an nih avangin mihring hriselna atana pawi thei tur hmang lo tura beisei a ni," a ti a; pesticides hman chungchangah mipui leh loneitute aṭangin complaint an la dawn loh thu a sawi.

Mizo zinga cancer vei an tam leh pesticides hmanin inkaihhnawihna a neih leh neih loh zawhna chhangin C Lalrinsanga chuan, "Mizo zingah cancer leh pesticides hman inkaihhnawih dan hian mi ṭhenkhat sawi leh ngaihven a hlawh niin a hriat a, zir chian lehzual pawh a ṭha mai thei e. Amaherawhchu, Agriculture department chauhin a zir chian chi niin a lang lo," a ti.