Mimal sikula thawk insawifiah tura DEO-in a tih thu House-ah sawi lang

ZPM member Andrew H Thangliana chuan nimina Assembly session-ah, lumpsum grant-in-aid dawng private school-a thawk chu show cause notice pek a nih thu a sawi chhuak. School Education minister Lalchhandama Ralte erawh chuan, private school-a thawktu appoinment pekah sorkar a inrawlh loh thu a sawi.

Andrew H Thangliana chuan, lumpsum (grant-in-aid) dawng purely private school-a thawkteah VC Secretary appointment pek awm ta se la, dual post tiin show cause notice a pek theihna dan a awm em? tiin a zawt a; Education Minister chuan, private school-a thawktu appoinment pekah sorkar a inrawlh loh thu sawiin, "Hetiang sikulah hian hna siam pawh a ni lo. Chuvangin, dual post tih theih a ni lo," a ti.

Andrew H Thangliana chuan, a bial chhunga Kawnpuiah private school-a headmaster chu VC secretary-ah ruat a nih thu sawiin, "Kolasib DEO aṭangin show cause notice pein, headmaster leh VC secretary-ah a duh zâwk thlang tura tih a ni. Dual post chelh anga puh a ni. Politics-a inhêkna a awm vang a ni. Ka hriat chinah consolidated fund aṭanga hlawh pek loh chu sorkar hnathawkah ngaih an ni lo," a ti.

School Education Minister chuan, kalphung hriat tâwk loh palh awm thei a nih thu sawiin, private school chu management hran a ni tih inhriattir nawnnaah ngaih ni se a duh thu a sawi a ni.