Leilet/huan neite zawm tur tichhuak
Kolasib district magistrate Dr H Lalthangliana chuan nimin khan Kolasib district-a leilet/huan neite'n leilet/huan enkawltu tur mi dang an chhawr chungchanga inkaihhruaina tur a tichhuak a, zâwm ṭheuh turin leilet/huan neitute a hriattir.
Dr H Lalthangliana chuan, in hmun/lo ram reng reng Scheduled Tribe (ST) ni lo hnena hralh chu dan kalh a nih avangin, duh duh hnena hralh ngawt loh tur a nih thu a tarlang bawk.
Kolasib Magistrate thuchhuah
1. A theih chen chenah Zo hnahthlak ngei chhawr tum tur.
2. Zo hnahthlak hmu lo tan Mizoram khua leh tui dik tak chauh chhawr tur.
3. Hnam dang, Mizoram páwna mi chhawr reng rengin, an mi chhawr turte ILP an siamsak ngei tur a ni.
4. ILP siamsak loa hnam dang chhawr an awm chuan an chungah dan anga action lâk a ni ang.
5. Sorkarin ngaihhnathiamna a pekte tiam loin, ILP nei loin state páwn lam mi (ST ni lo) chhawr phal a ni lo.
6. State páwn leh chhunga hnam dang chhawr reng rengin an mi chhawrte an chhawr hmain intiamkamna (agreement) felfai tak an ziahpui ngei tur a ni.
Intiamkamnaa tihlan turte
(i) A neituin rem a tih chen chauh an leileta chen leh enkawl phalsak an ni tih thu ziah tel tur.
(ii) Agreement hi hunbi / hun chhung neiin siam tur a ni.