2018 inthlanah ZPM kha independent-in an ding - MNF

MNF chuan thuchhuah siamin, Zoram Peoples’ Movement (ZPM)-te chu a tìrah political party ni loin, páwl hrang hrang intél khawm an nih avangin ZPM party-in MLA an nei lo niin an tarlang a; ZPM chuan MLA election 2018-ah political party an nih loh avangin independent-in MLA seat 38 an chuh tih an sawi.

MNF chuan, "MLA inthlan an chuh khan independent candidate vek an ni. MLA seat pasarih an la. Inthlanpui zawh, kum khat leh a chanve hnu June 3, 2019 khan Election Commission of India-in political party angin a pawm ve chauh a ni," an ti.

MNF chuan, ZPM-in MLA pasarih an neih hnuah Assembly House legislature group affiliation atan Speaker hnenah Zoram Peoples’ Movement Legislature Party tia hming vuah an dil angin Speaker-in January 16, 2019-ah a pawmsak tih sawiin, "Zoram Peoples’ Movement Legislature Party tiin hriat an lo ni ta," an ti a; chumi rual chuan MNF, BJP, Congress legislature party-te pawh pawm vek an nih thu 

an sawi.

ZPM Legislature Party tih a nih avangin ZPM chu political party an ni tihna a ni loa sawiin MNF chuan, "Rule 4 Sub-No (3) of the Members of Mizoram Legislative Assembly (Disqualification on Ground of Defection) Rules, 1987 hnuaiah Assembly chhung inrêlbàwlna atan chauh legislature party/group an din a ni," an ti.

MNF tarlan danin, ZPM chu ECI-in June 3, 2019-ah a pawm tâk avangin Assembly Speaker-in September 18, 2019-ah Zoram Peoples Movement tih chu hman zel a rem loh thu a hrilh a; chuvang chuan January 20, 2020-ah Zo Peoples Movement Legislature Party din an dil a, chu chu Speaker-in February 5, 2020-ah a pawmsak a ni.